Փաստաբան Ռուբեն Մխիթարյանի ձերբակալությունը միանգամայն անօրինական էր։ Այս մասին նոյեմբերի 20-ի մամուլի ասուլիսում հայտարարել է նրա փաստաբան Լիանա Գասպարյանը։
Հիշեցնենք, որ Մխիթարյանը ձերբակալվել էր այն բանի համար, որ հոկտեմբերի 20-ին ներկա է եղել Գյումրու քաղաքապետարանի դիմացի հրապարակում՝ քաղաքապետ Վարդան Ղուկասյանի ձերբակալության դեմ գյումրեցիների բողոքի ակցիայի ժամանակ։ Լինելով փաստաբան՝ Մխիթարյանը փորձել է հանդարտեցնել մարդկանց և նրանց իրավական օգնություն ցուցաբերել։ Մխիթարյանի գործողություններում իրավապահները քրեական բաղադրիչ են տեսել։
Փաստաբանը հիշեցրել է, որ հոկտեմբերի 23-ին Շիրակի դատարանը անօրինական կերպով ձերբակալել է Ռուբեն Մխիթարյանին՝ իր մասնագիտական պարտականությունները կատարելիս։ Նա մեկ ամիս անցկացրել է անօրինական կալանքի տակ։ Նոյեմբերի 18-ին դատավոր Ռուբեն Ռշտունին նրան ազատ է արձակել։ Փաստաբանը հատուկ շնորհակալություն է հայտնել դատավորին՝ SMS-ով հրահանգները չկատարելու համար։
«Իմ գործընկերը բացառիկ լավ է կատարել իր մասնագիտական պարտականությունները։ Ռուբենի դեպքը ցույց է տալիս, որ ամբողջ իրավաբանական հանրությունը սպառնալիքի տակ է և փաստաբանները չեն լռելու, այլ պայքարելու են իրական արդարադատության համար», — ընդգծել է Լիանա Գասպարյանը։
Ռուբեն Մխիթարյանը շնորհակալություն է հայտնել բոլոր նրանց, ովքեր օգնել և աջակցել են իրեն, որից հետո խոսել է հոկտեմբերի 20-ի իրադարձությունների մասին։
