Չեմպիոնների լիգայի 2025/26 մրցաշրջանի լիգայի փուլի առաջին տուրում Մադրիդի «Ռեալը» «Սանտյագո Բեռնաբեու» մարզադաշտում 10 հոգով կամային հաղթանակ տարավ ֆրանսիական «Մարսելի» նկատմամբ (2:1)։
Հանդիպման հաշիվը 22-րդ րոպեին բացեց հյուրերի հարձակվող Տիմոտի Վեան։ Մադրիդյան գրանդի պատասխան գոլերը խփեց Կիլիան Մբապեն՝ հստակ իրացնելով 11-մետրանոց հարվածները 29-րդ և 81-րդ րոպեներին։ «Սերուցքայինները» 72-րդ րոպեից սկսած մնացին 10 հոգով, քանի որ թիմի ավագ Դանի Կարվախալը հեռացվեց խաղադաշտից ուղիղ կարմիր քարտով՝ մրցակցի դեմքին հարվածելու համար։
Նշենք, որ «արքայական» ակումբը Չեմպիոնների լիգայի խաղարկություններում խփեց իր 700-րդ գոլը և տարավ 200-րդ հաղթանակը։
Զուգահեռ ընթացող խաղում մեկ այլ իսպանական թիմ՝ «Վիլյառեալը», հյուրընկալվելիս նվազագույն հաշվով՝ 0:1, պարտվեց Լոնդոնի «Տոտենհեմին»։
