Հայ հասարակությունը չի կարողանում հասկանալ, թե ինչպես է հնարավոր խաղաղության ուղղությամբ շարժվել Ադրբեջանի և Թուրքիայի ղեկավարների կողմից հնչող շարունակական ագրեսիվ հռետորաբանության պայմաններում։ Այս մասին սեպտեմբերի 15-ին Հայաստանի Ազգային ժողովում ավանդական ճեպազրույցների ժամանակ հայտարարել է «Հայաստան» խմբակցության ղեկավար Սեյրան Օհանյանը։
Մասնավորապես, նա ևս մեկ անգամ հիշեցրել է Լեռնային Ղարաբաղից հայերի արտաքսման մասին, ինչը, պատգամավորի կարծիքով, ցեղասպանության վառ դրսևորում է։ Օհանյանը համաձայն չէ իշխանությունների պնդումներին, թե Հայաստանի և Ադրբեջանի միջև խաղաղությունը անվտանգության երաշխիք է։ «Խաղաղությունը չի կարող անվտանգության երաշխիք լինել։ Այն պետք է լինի ազգային անվտանգության ռազմավարության հիմնարար հարցը, որը հիմնված է ազգային և միջազգային երաշխիքների վրա։ Ազգային երաշխիքներն են բանակն ու ներքին իրավապահ մարմինները, իսկ միջազգային երաշխիքները՝ պետության արտաքին քաղաքականությունը», — պարզաբանել է ընդդիմադիրը։
