Ուկրաինայի նախագահ Վլադիմիր Զելենսկին հայտարարել է, որ Ռուսաստանի և Ուկրաինայի բանակցային թիմերը Ստամբուլում կայացած հանդիպման ժամանակ սկսել են քննարկել երկու երկրների առաջնորդների հնարավոր գագաթնաժողովը, հաղորդում են Reuters-ը և AFP-ն: Ուկրաինայի առաջնորդը հայտնել է այս հարցում որոշակի առաջընթացի մասին:
«Նրանք սկսեցին սա քննարկել մեզ հետ բանակցությունների ընթացքում։ Սա արդեն առաջընթաց է որոշակի հանդիպման ձևաչափի ուղղությամբ», — AFP-ն մեջբերում է Վլադիմիր Զելենսկուն։
Ստամբուլում ուղիղ բանակցությունների երրորդ փուլից հետո ռուսական պատվիրակության ղեկավար, ՌԴ նախագահի օգնական Վլադիմիր Մեդինսկին հայտարարել է, որ նման հանդիպում հնարավոր է միայն այն փուլում, երբ խաղաղ կարգավորման մասին համաձայնագիրն արդեն պատրաստ լինի ստորագրման։
Ուկրաինական պատվիրակության ղեկավար Ռուստեմ Ումերովը բանակցություններից հետո հայտարարել է, որ առաջնորդների մակարդակով հանդիպումը «կարող է իրական քաղաքական առաջընթաց ապահովել»։
Վլադիմիր Զելենսկին ասել է, որ նման գագաթնաժողովի քննարկումը ուկրաինական պատվիրակության ամենակարևոր խնդիրներից մեկն է ռուսական կողմի հետ հանդիպման ժամանակ։ Կրեմլն արդեն իսկ նման հանդիպումը վաղաժամ է անվանել, մինչև կողմերը չհամաձայնեցնեն խաղաղության համաձայնագրի պայմանները։
