ԱՄՆ նախագահ Դոնալդ Թրամփը հայտարարել է, որ կարծում է, որ Ռուսաստանի նախագահ Վլադիմիր Պուտինը մտահոգված չէ Ուկրաինայում Ռուսաստանի զինված ուժերի կորուստներով: Pod Force One փոդքասթում Թրամփը, պատասխանելով լրագրող Միրանդա Դիվայնի հարցին այն մասին, թե արդյոք Ռուսաստանի առաջնորդը մտահոգված է այն փաստով, որ ռուսական բանակը «ամեն շաբաթ հինգ հազար մարդ» է կորցնում Ուկրաինայում, ասել է. «Սկսում եմ մտածել, որ նրա համար միեւնույն է։ Նա շատ զինվորներ է կորցնում, ինչպես եւ Ուկրաինան։ Տեսնենք, թե հետո ինչ կլինի»։
Միեւնույն ժամանակ, Թրամփը նշել է, որ հենց որ խաղաղության ջանքերում առաջընթաց է գրանցվում, «հանկարծակի ռմբակոծվում է ինչ-որ բան, որը չպետք է ռմբակոծվեր», եւ առաջընթացը չեղյալ է հայտարարվում: Հունիսի սկզբին ամերիկյան լրատվամիջոցները, հղում կատարելով աղբյուրներին, գրել էին, որ Սպիտակ տունը դժգոհ է Ուկրաինայի ԶՈւ գործողությունից, որը ներառում էր անօդաչու թռչող սարքերի հարվածներ ռուսական ռազմական օդանավակայաններին: Axios-ը հաղորդել է, որ Թրամփը մտահոգված է, որ ուկրաինական անօդաչու թռչող սարքի հարձակումը կստիպի Պուտինին հակահարված տալ եւ խափանել իր դիվանագիտական նախաձեռնությունը, որը հանգեցրել էր երեք տարվա ընթացքում առաջին ռուս-ուկրաինական բանակցություններին։
Հունիսի 5-ին Թրամփը հայտնել էր, որ Վլադիմիր Պուտինը եւ Վլադիմիր Զելենսկին «ատում են» միմյանց եւ համեմատել է նրանց վարքագիծը այգում կռվող երկու երեխաների հետ։ «Պուտինը եւ ես այգու խաղահրապարակում գտնվող երեխաներ չենք։ Նա [Պուտինը] մարդասպան է, որը եկել է այս այգի՝ երեխաներ սպանելու», պատասխանել է Ուկրաինայի նախագահը Թրամփին։
