ԱՄՆ նախագահ Դոնալդ Թրամփի քաղաքական խորհրդականները պատրաստվում են միլիարդատեր Իլոն Մասկի հետ հնարավոր «երկարատև պատերազմի»՝ նրանց հրապարակային բաժանումից հետո, հաղորդում է The New York Times-ը՝ հղում անելով ամերիկացի առաջնորդին մոտ կանգնած աղբյուրին։
Նրա խոսքով՝ Թրամփի թիմը քննարկում է բաց բախման սցենար, որի դեպքում քաղաքականության և տեխնոլոգիական ոլորտի և՛ Թրամփի, և՛ Մասկի դաշնակիցները ստիպված կլինեն «կողմեր ընտրել»։
Հրապարակման համաձայն՝ նախագահի և SpaceX-ի սեփականատիրոջ միջև խզումը ցնցում է առաջացրել Մասկի շրջապատում. նրա կողմնակիցներն ու գործընկերները անվստահություն են հայտնել Սպիտակ տան ղեկավարի մասին նրա կոշտ հայտարարությունների նկատմամբ։
Մասկի որոշ դաշնակիցներ վստահություն են հայտնել, որ նա կկարողանա պահպանել և նույնիսկ ընդլայնել իր ազդեցությունը Թրամփի հետ բախման մեջ։ Սակայն, ըստ թերթի, «տեխնոլոգիական պահպանողական» միջավայրում, որը նախկինում աջակցում էր Թրամփի վարչակազմին, մտահոգիչ տրամադրություն է տիրում. այս ոլորտի ներկայացուցիչների կարծիքով՝ Մասկը չափազանց մեծ հակամարտության մեջ է ներքաշվել, որի հետևանքները կարող են շրջվել նրա դեմ։
The New York Times-ի աղբյուրները նշում են, որ Թրամփի և Մասկի միջև սերտ համագործակցությունը սկզբում երկարատև չէր ընկալվում, սակայն նրանց միջև այդքան արագ խզումն անսպասելի էր նույնիսկ գործարարի ամենամոտ շրջապատի համար։
