2025 թվականի հաստատված բյուջեն որոշակի առումով խնդրահարույց է:
Այս մասին Ազգային ժողովում ասել է ՀՀ առողջապահության նախարար Անահիտ Ավանեսյանը:
«2022 թվականին մենք ունեցել ենք ՀՆԱ-ի 1,5 տոկոսի շրջանակում առողջապահության ծախսեր, 2023-ին դարձել է 1,6 տոկոս, 2025 թվականի այս բյուջեի շրջանակներում այն վերադարձել է 1,5 տոկոսի շրջանակներին, ինչը, կարծում ենք, ընդհանուր առմամբ, որպես առաջնահերթություն, չի արտահայտում մեր դիրքորոշումները»,- նշել է նա:
Անդրադառնալով կապիտալ ծախսերին՝ Ավանեսյանը նշել է, որ 2025 թվականի համար մի քանի սկզբունքային քաղաքական որոշում է կայացվել, ինչի արդյունքում որոշվել է, որ այլևս «վերակառուցումների չեն գնալու», կառուցվելու են նոր շենքեր, նոր բժշկական կենտրոններ:
«Անգամ 20-30 տարվա հնության շենքերն այսօր չեն բավարարում նոր ստանդարտներին, բուժառուակենտրոն նոր միջավայր ստեղծելու հնարավորություններին, և այս պատճառով է, որ 7 պոլիկլինիկաների վերակառուցումը վերափոխվել է, և արդեն իսկ կազմվել են կառուցման նախագծեր: Հաջորդ տարվանից կլինեն մրցույթներ, և կկառուցվեն»,- մանրամանել է նախարարը:
