Եվրամիությունը մտահոգված է Վրաստանի վարչապետի և «Վրացական երազանք»-ի այլ ներկայացուցիչների հայտարարություններով՝ կապված ընդդիմադիր կուսակցությունների արգելքի հետ։
Եվրամիության (ԵՄ) արտաքին հարաբերությունների խոսնակ Պետեր Ստանոն Թբիլիսիին հիշեցրել է «ժողովրդավարության հիմնական սկզբունքները հարգելու անհրաժեշտության մասին, որոնց հիմնական տարրերից մեկը քաղաքական բազմակարծությունն է»։
«Ամուր և համախմբված ժողովրդավարական ինստիտուտներն ու գործընթացներն առանցքային են ԵՄ-ին անդամակցելու գործընթացում», — ասել է նա:
Պիտեր Ստանոն շեշտել է, որ ԵՄ-ն ակնկալում է՝ այս հոկտեմբերի 26-ին կայանալիք ընտրությունները կլինեն մրցակցային՝ միջազգային չափանիշներին համապատասխան և կարտացոլեն վրաց ժողովրդի կամքը։
«Վրացական երազանք»-ը նախորդ շաբաթ հայտարարեց, որ ընտրություններում հաղթելու և խորհրդարանում սահմանադրական մեծամասնություն ստանալու դեպքում նախկին նախագահ Միխեիլ Սաակաշվիլիի հիմնադրած «Ազգային միացյալ շարժումը» կհայտարարվի հակասահմանադրական կուսակցություն։
Վարչապետ Իրակլի Կոբախիձեն ասել է, թե քաղաքական կուսակցությունների գործունեությունն արգելելը ժողովրդավարական գործընթաց է, և տարբեր երկրներում կուսակցություններ արգելելու մի քանի օրինակ է բերել։
