Արթուր Ալեքսանյանի մարզիչն ու հայրը՝ Գևորգ Ալեքսանյանը խոսել է որդու օլիմպիական եզրափակիչ գոտեմարտի բողոքարկման ընթացքի, մրցավարից դժգոհության մասին։
Նա նշել է, որ նման նախադեպ եղել է տարբեր սպորտաձևերից՝ և’ օլիմպիական խաղերին, և’ աշխարհի առաջնություններին․ «Եթե մենք մենակ չմնանք, իմաստ ունի բողոքարկելը»։
Նրա խոսքով՝ պահանջվում է տեսանյութով ու նկարներով օրենքի կետերով հիմնավորել ասածները, որից հետո որոշում կկայացվի։
«Եթե իրենց որոշումը չբավարարեց, արդարությունը նորից չվերականգնվեց, գնալու ենք հաջորդական քայլերով, սպորտային իրավաբան ենք գտնելու»,- հավելել է։
Հիշեցնենք՝ Օլիմպիական խաղերի չեմպիոն, աշխարհի քառակի ու Եվրոպայի 7-ակի ոսկե մեդալակիր Արթուր Ալեքսանյանը Փարիզի օլիմպիական խաղերի ըմբշամարտի եզրափակիչ գոտեմարտում վաստակել է փոխչեմպիոնի տիտղոսն ու արժանացել արծաթե մեդալի:
Հայաստանի ըմբշամարտի ֆեդերացիան բողոքարկել է հունահռոմեական ոճի ըմբիշ, 98 կգ քաշային Արթուր Ալեքսանյանի եզրափակիչ գոտեմարտը Փարիզի ամառային Օլիմպիական խաղերում:
Հիշեցնենք՝ ըմբշամարտի միջազգային ֆեդերացիան գրավոր պատասխանել է՝ նշելով, որ մրցավարները ճիշտ են դատել Ալեքսանյանի օլիմպիական գոտեմարտը:
