Լարված իրավիճակ Թբիլիսիում․ հատուկ ջոկատայինները ցուցարարներին հեռացնում են խորհրդարանի մուտքերի մոտից

Թբիլիսիի կենտրոնում՝ խորհրդարանի շենքի մոտ իրավիճակը լարված է․ուժայինները ցուցարարներին հեռացնում են խորհրդարանի մուտքերի մոտից։ Հենց այս մուտքերով իշխող «Վրացական երազանք»-ի պատգամավորները կգան խորհրդարան այսօր երրորդ ընթերցմամբ քննարկելու «օտարերկրյա գործակալների մասին» օրենքը։

Աղմկահարույց նախաձեռնությանը դեմ քաղաքացիները նախօրեին ժամը 22:00-ին հավաքվել էին Ռուսթավելի պողոտայում և, ինչպես նախատեսված էր, ամբողջ գիշեր անցկացրել են այնտեղ։ Ակցիան խաղաղ է ընթացել։

Այսօր նախքան մի քանի տարածքներից ցուցարարներին հեռացնելը, Ներքին գործերի նախարարության ներկայացուցիչները 5 րոպե ժամանակ են տվել ցուցարարներին տարածքը լքելու համար։ Ուժայիններ կան նաև Ազատության հրապարակում։ Նրանք ակտիվ միջոցներ չեն ձեռնարկում ցուցարարների նկատմամբ։

Վրաստանի խորհրդարանն այսօր երրորդ և վերջնական ընթերցմամբ քվեարկության կդնի «Օտարերկրյա ազդեցության թափանցիկության մասին» օրինագիծը։

Ընդդիմության առաջնորդներից Գիորգի Վաշաձեն ասել է, որ եթե օրենքն ընդունվի, ապա ԱՄՆ-ի կողմից կսահմանվեն անձնական պատժամիջոցներ փաստաթղթին կողմ քվեարկած պատգամավորների և «Վրացական երազանք» կուսակցության հիմնադիր, միլիարդատեր, նախկին վարչապետ Բիձինա Իվանիշվիլիի նկատմամբ։

Վրաստանում օրինագծի առաջին և երկրորդ ընթերցումներն ուղեկցվել են բողոքի ցույցերով, ընդհարումներով ու ձերբակալություններով։

Միացյալ Նահանգները և Եվրոպական միությունը, մի շարք իրավապաշտպան միջազգային կառույցներ Թբիլիսիին կոչ են անում հրաժարվել այդ օրենքից, սակայն «Վրացական երազանք»-ը պնդում է, որ այն կնպաստի դեմոկրատիայի զարգացմանը:

Եթե օրինագիծն ընդունվի, ապա 20 և ավելի տոկոսով դրսից ֆինանսավորվող ՀԿ-ները պարտավորված կլինեն գրանցվել որպես «օտարերկրյա գործակալներ»:

Նախագահ Սալոմե Զուրաբիշվիլին և ընդդիմադիր կառույցները վիճահարույց փաստաթուղթն անվանում են ««ռուսական օրենք», քանի որ այն քիչ է տարբերվում Ռուսաստանում գործող նմանօրինակ օրենքից, որը հասարակական կազմակերպությունների և անկախ մամուլի ազատությունը ճնշելու լայն հնարավորություններ է ընձեռել:

Արևմտյան գործընկերները նշել են, որ օրենքի ընդունումը կարող է լուրջ խոչընդոտ դառնալ Եվրամիությանը Վրաստանի անդամակցման ճանապարհին։

Լրահոս

Օրացույց

Մայիսի 2024
Ե Ե Չ Հ Ու Շ Կ
 12345
6789101112
13141516171819
20212223242526
2728293031