Ոստիկաններն Աբովյանում ճանապարհներ չեն փակել։
Այս մասին «Հայկական ժամանակ»-ի հետ զրույցում ասաց ՆԳՆ մամուլի խոսնակ Նարեկ Սարգսյանը՝ անդրադառնալով սոցիալական ցանցերով տարածվող լուրերին, թե ոստիկաններն Աբովյանում փակել են ճանապարհները, որպեսզի մարդիկ չկարողանան հասնել Երևան՝ մասնակցելու հանրահավաքին։
«Այդ ճանապարհի երթևեկությունը մի պահ դադարեցվել է Երևան եկող երթի մասնակիցների անվտանգությունն ապահովելու նպատակով։ Երթի այդ հատվածով անցնելուց հետո ճանապարհը բացվել է։ Ներկա պահին դադարեցված է միայն Հանրապետության հրապարակի երթևեկությունը՝ հավաքի մասնակիցների անվտանգությունն ապահովելու նպատակով»,- տեղեկացրեց Սարգսյանը՝ նշելով, որ հանրապետությունում այլ փակ ճանապարհներ չկան։
«Կոչ ենք անում չճշտված տեղեկություններ չհրապարակել»,- ասաց ՆԳՆ մամուլի խոսնակը։
