Ճապոնիայի աջ ուժերն օգտագործում են արհեստական բանականության տեխնոլոգիաները պատմական արխիվները զտելու համար՝ փորձելով արդարացնել պատասխանատվությունը ռազմական հանցագործությունների համար և խեղաթյուրել պատմական ճշմարտությունը, ճեպազրույցի ժամանակ հայտարարել է Չինաստանի ԱԳՆ պաշտոնական ներկայացուցիչ Գո Ցզյակունը, հաղորդում է ՌԻԱ Նովոստի-ն:
Դիվանագետի խոսքով՝ Ճապոնիայում ուժեղանում է պատմական փաստերի ժխտման միտումը, իսկ ճապոնական դասագրքերը շարունակում են մեղմել ճապոնական ագրեսիայի գնահատականը։
նշենք, որ այսօր ՉԺՀ-ում անցկացվում են հիշատակի միջոցառումներ՝ նվիրված Մուկդենյան միջադեպի 95-րդ տարելիցին, որը դարձավ Չինաստանի հյուսիս-արևելքի ճապոնական օկուպացիայի սկիզբը։
1931 թվականի սեպտեմբերի 18-ի գիշերը ճապոնական զինվորականները պայթեցրել էին Հարավմանչժուրական երկաթուղու մի հատվածը Շենյան քաղաքի մոտ, որը արևմտյան և ճապոնական պատմագրության մեջ անվանվում էր Մուկդեն, ինչից հետո դիվերսիայի մեջ էին մեղադրել չինական կողմին և հարձակվել չինական զորքերի դիրքերի վրա։ Սադրանքը առիթ դարձավ ճապոնական Կվանտունյան բանակի հարձակման համար։
Հետագա մի քանի ամիսների ընթացքում Ճապոնիան հաստատեց իր վերահսկողությունը Մանչժուրիայի նկատմամբ և այնտեղ ստեղծեց Մանչժոու-Գո մարիոնետային պետությունը։ Չինաստանում Մուկդենյան միջադեպը դիտարկվում է որպես չին ժողովրդի՝ ճապոնական ագրեսիայի դեմ երկարատև դիմադրության պատերազմի սկիզբ, որը տևեց 14 տարի և ավարտվեց 1945 թվականին։
