Մեծ Բրիտանիան ԱՄՆ-ին չի թույլատրել օգտագործելու իր ռազմական բազաները Իրանին հարվածելու համար, գրում է The Times-ը՝ հղում անելով աղբյուրներին։
Պարբերականի տվյալներով՝ Վաշինգտոնը մշակում է Թեհրանի դեմ ռազմական գործողության մանրամասն ծրագրեր, որոնք կներառեն Հնդկական օվկիանոսում Դիեգո Գարսիայի կղզում տեղակայված համատեղ բրիտանա-ամերիկյան ռազմաբազայի և Գլոսթերշիրում տեղակայված Ֆեյրֆորդի ավիաբազայի օգտագործումը, որը Եվրոպայում ԱՄՆ ծանր ռմբակոծիչների համար կարևոր բազա է։ Սակայն Լոնդոնը դեռևս չի տվել իր համաձայնությունը՝ վախենալով, որ Իրանի վրա ԱՄՆ-ի հարվածը կարող է «միջազգային իրավունքի խախտում» համարվել։
The Times-ը նշում է, որ բրիտանական կառավարության այս դիրքորոշումը զայրացրել է ԱՄՆ նախագահ Դոնալդ Թրամփին։ Փետրվարի 18-ին նա քննադատել է Մեծ Բրիտանիայի և Մավրիկիոսի միջև կնքված համաձայնագիրը, ըստ որի Չագոս արշիպելագի նկատմամբ ինքնիշխանությունը փոխանցվում է Մավրիկիոսին։ Անցյալ տարվա մայիսի 22-ին ստորագրված համաձայնագիրը խորհրդարանը դեռևս չի վավերացրել։ Այն նախատեսում է Դիեգո Գարսիայի վրա բրիտանա-ամերիկյան բազայի պահպանում 99 տարի։ Մեծ Բրիտանիան Մավրիկիոսին տարեկան ավելի քան 100 միլիոն ֆունտ ստեռլինգ (135 միլիոն դոլար) կվճարի, միաժամանակ խստիվ արգելելով արտաքին կղզիներում օտարերկրյա անվտանգության ուժերի ներկայությունը։
Թրամփը Truth Social սոցիալական ցանցում հայտարարել է, որ Մեծ Բրիտանիայի վարչապետ Քեյր Սթարմերը «մեծ սխալ» է թույլ տալիս՝ Մավրիկիոսի արշիպելագը հանձնելով՝ միաժամանակ ընդգծելով, որ չպետք է ձեռնարկի քայլեր, որոնք կարող են վտանգել բազայի վերահսկողությունը։ ԱՄՆ նախագահը չի բացառել նաև, որ Վաշինգտոնը հնարավոր է անհրաժեշտություն ունենա օգտագործելու Դիեգո Գարսիայի բազան՝ Իրանից հնարավոր սպառնալիքը կանխելու համար։
Չագոսը նախկինում Մավրիկիոսի բրիտանական գաղութի մաս էր կազմում, սակայն 1965 թվականին Լոնդոնը արշիպելագը դարձրեց առանձին վարչական միավոր։ 1968 թվականին Մավրիկիոսն անկախացավ, մինչդեռ Չագոսը մնաց բրիտանական կառավարման ներքո։ 1966 թվականին Միացյալ Նահանգները վարձակալեց Դիեգո Գարսիային և այնտեղ ավիաբազա կառուցեց՝ արտաքսելով արշիպելագի բոլոր 1500 բնակիչներին։
2017 թվականին Մավրիկիոսը փորձագիտական եզրակացություն ստացավ Միջազգային դատարանից, որը 2019 թվականի փետրվարին բավարարեց երկրի պահանջները և սպառնաց ռազմաբազայի գործունեությանը։ Ըստ Սթարմերի՝ Չագոսը Մավրիկիոսին հանձնելը կապահովի բազայի կայուն գործունեությունը։
