ԱՄՆ նախագահ Դոնալդ Թրամփը հայտարարել է այսպես կոչված «Խաղաղության խորհրդի» ստեղծման մասին, որը, նրա խոսքով, կհսկի Գազայի հատվածի հետպատերազմյան կառավարումը: Նա այս մասին գրել է Truht Social սոցիալական մեդիա հարթակում:
«Ինչպես հայտարարել է Սթիվ Վիտկոֆը, մենք պաշտոնապես անցել ենք Գազայի հատվածի համար 20 կետանոց խաղաղության ծրագրի հաջորդ փուլին», — գրել է նա:
ԱՄՆ նախագահի խոսքով՝ Խաղաղության խորհուրդը սերտորեն կհամագործակցի նորանշանակ պաղեստինյան տեխնոկրատական կառավարության՝ Գազայի ազգային կառավարման կոմիտեի հետ: Այն կկառավարի Գազայի հատվածը անցումային շրջանում:
Թրամփը նաև հայտարարել է, որ հրադադարի հայտարարումից ի վեր իր վարչակազմը Գազայի հատվածին տրամադրել է ռեկորդային մակարդակի մարդասիրական օգնություն:
Նա կարծում է, որ սա ստեղծել է անհրաժեշտ պայմաններ խաղաղության գործընթացի հաջորդ փուլին անցնելու համար:
ԱՄՆ նախագահը նաև ընդգծել է Համասի լիակատար ապառազմականացման անհրաժեշտությունը: Նրա խոսքով՝ Եգիպտոսի, Թուրքիայի և Կատարի աջակցությամբ նախատեսվում է համապարփակ համաձայնագիր, որը ներառում է բոլոր զենքերի հանձնումը և խմբավորման թունելային ենթակառուցվածքների ապամոնտաժումը։
Թրամփը կոչ արեց Համասին անհապաղ կատարել իր պարտավորությունները, այդ թվում՝ մահացածների վերջին մարմինների վերադարձը Իսրայել։
«Գազայի ժողովուրդը բավական երկար է տառապել։ Ժամանակն է եկել», — եզրափակեց նա։
Հունվարի 14-ին Միացյալ Նահանգները հայտարարեց նախագահ Դոնալդ Թրամփի 20 կետանոց ծրագրի երկրորդ փուլի մեկնարկի մասին՝ Գազայի հատվածում պատերազմը դադարեցնելու համար։ Այս ծրագիրը նախատեսում է անցում ապառազմականացման, տեխնոկրատական կառավարման և վերակառուցման։ ԱՄՆ նախագահի հատուկ դեսպանորդ Սթիվ Վիտկոֆը այս մասին գրել է X սոցիալական ցանցում։
