Սաուդյան Արաբիան ժամանակի ընթացքում կմիանա Աբրահամի համաձայնագրերին՝ Իսրայելի հետ հարաբերությունները կարգավորելու համար։ ԱՄՆ նախագահ Դոնալդ Թրամփը այս մասին հայտարարել է Իսրայելի վարչապետ Բենիամին Նեթանյահուի հետ համատեղ մամուլի ասուլիսում՝ երկկողմ հանդիպումից հետո։
Ամերիկացի առաջնորդը նշել է, որ համաձայնագրի անդամակցության ընդլայնման գործընթացը կընթանա «բավականին արագ»։ «Սաուդյան Արաբիան շատ լավ է եղել։ Ինչքան ես հասկանում եմ, նրանք արել են այն ամենը, ինչ մենք կարող էինք խնդրել նրանց՝ Իսրայելի հետ լավ հարաբերություններ հաստատելու համար», — ասել է Թրամփը։
ԱՄՆ նախագահը վստահություն հայտնեց, որ Ռիադը կձևակերպի իր հարաբերությունները հրեական պետության հետ։ «Նրանք [կհաշտվեն], և որոշ պահի նրանք կստորագրեն Աբրահամի համաձայնագրերը», — ընդգծել է նա։
Նոյեմբերի 18-ին Սպիտակ տանը Թրամփի հետ հանդիպման ժամանակ Սաուդյան Արաբիայի թագաժառանգ Մուհամմեդ բին Սալման ալ Սաուդը ընդգծեց, որ Իսրայելի հետ հարաբերությունները կարգավորելու համար Ռիադին անհրաժեշտ է «անշրջելի, հավաստի և ժամանակային առումով սահմանափակված ուղի» դեպի Պաղեստինյան պետություն ստեղծելը։
2020 թվականի սեպտեմբերին Իսրայելը, ԱՄՆ միջնորդությամբ, միացավ ԱՄԷ-ի և Բահրեյնի հետ հարաբերությունների կարգավորման համաձայնագրի։ Եռակողմ համաձայնագիրը հայտնի էր որպես «Աբրահամի համաձայնագրեր»։ Մարոկկոն և Սուդանը հետագայում հայտարարեցին հրեական պետության հետ հարաբերությունների կարգավորման մասին։ Այս համաձայնագրերից առաջ Իսրայելը դիվանագիտական հարաբերություններ էր հաստատել միայն Եգիպտոսի և Հորդանանի հետ։
