ԱՄՆ նախագահ Ջո Բայդենը սեպտեմբերի 25-ին Նյու Յորքում ավանդական ընդունելության ժամանակ կհյուրընկալի համաշխարհային առաջնորդներին և ՄԱԿ-ի բարձրաստիճան պաշտոնյաներին։
Վրաստանի վարչապետ Իրակլի Կոբախիձեն, ով գլխավորում է ՄԱԿ-ի Գլխավոր ասամբլեայում վրացական պատվիրակությունը, եղել է նախագահի ընդունելությանը հրավիրվածների ցանկում, սակայն Բայդենի վարչակազմը չեղարկել է հրավերը, հայտնում է «Ամերիկայի ձայն»-ը:
Վարչակազմի բարձրաստիճան պաշտոնյան և Կոնգրեսի մեկ այլ աղբյուր հաստատել են հրավերի չեղարկումը:
Վարչակազմը մերժել է նաև վրացական պատվիրակության հետ բոլոր հանդիպումները, իսկ Սպիտակ տան ազգային անվտանգության հարցերով խորհրդական Ջեյք Սալիվանը հրաժարվել է հանդիպել վարչապետ Կոբախիձեի հետ։ Վրաստանի վարչապետի գրասենյակը, «Ամերիկային ձայն»-ի հարցին ի պատասխան, հաստատել է հրավերի չեղարկումը, միևնույն ժամանակ շեշտելով, որ «Սալիվանի հետ հանդիպում նախատեսված չէր»։
«Ամերիկայի ձայն»-ը նշում է, որ չեղարկման պատճառը Վրաստանի կառավարության հակաժողովրդավարական քայլերն են, այդ թվում՝«օտարերկրյա գործակալների» մասին օրենքի ընդունումը։
Ըստ հաղորդման՝ վրացական կառավարության հետ վերջին շփումը ամերիկյան վարչակազմին հույս չի ներշնչել, որ Թբիլիսին կփոխի իր քաղաքականությունը, այլ հակառակը՝ Վրաստանի կառավարության ձեռնարկած քայլերը վկայում են, որ նա վճռական է անտեսելու Վրաստանի Եվրատլանտյան ինտեգրումը և վրաց ժողովրդի կամքը։
Մայիսի 14-ին Վրաստանի խորհրդարանը երրորդ ընթերցմամբ ընդունել է օտարերկրյա ազդեցության թափանցիկության մասին օրենքը, ինչը խիստ քննադատության են ենթարկել իրավապաշտպանները, ՀԿ-ները, անկախ ԶԼՄ-ները և երկրի արևմտյան գործընկերները՝ Միացյալ Նահանգները և Եվրամիությունը:
Վրաստանի նախագահ Սալոմե Զուրաբիշվիլին մայիսի 18-ին վետո է դրել օրենքի վրա, սակայն օրենսդիրները մայիսի 28-ին քվեարկությամբ այն շրջանցել են, և նախագիծը մտել է ուժի մեջ:
Բրյուսելը հայտարարեց, որ որոշել է սառեցնել ԵՄ-ին Վրաստանի անդամակցության գործընթացը, նաև կասեցնել Վրաստանի պաշտպանության նախարարության համար նախատեսված 30 միլիոն եվրոյի հատկացումը։
Մինչ այդ էլ ԱՄՆ-ն չեղարկել էր վրաց-ամերիկյան ամենամյա զորավարժությունները՝ հայտարարելով, թե որոշումը պայմանավորված է «Միացյալ Նահանգների և արևմտյան այլ կառույցների հասցեին կեղծ մեղադրանքներով»։
