ԱՄՆ նախագահ Ջո Բայդենը վերստին կոշտ հայտարարություն է հնչեցրել Ռուսաստանի ղեկավար Վլադիմիր Պուտինի հասցեին, իսկ աշնանը կայանալիք նախագահական ընտրություններում իր գլխավոր մրցակից Դոնալդ Թրամփին անվանել է «Ռուսաստանի նախագահի փոքր շունը»։
Երեկ Միչիգանում տեղի ունեցած հանրահավաքում Բայդենն անդրադարձել է ռուս-ուկրաինական պատերազմի թեմայով Թրամփի դիրքորոշմանը:
«Լսեք, սա ահավոր լուրջ բան է: Երբ այդ դահին Պուտինը, որին ես վաղուց ճանաչում եմ, ներխուժեց Ուկրաինա՝ ի՞նչ ասաց Թրամփը: Ես դա չեմ հորինում: Նա նրան անվանեց հանճար, ասաց, որ հիանալի է»,- ասել է Բայդենը:
Դեմոկրատական նախագահը նաև նշել է, թե իրեն հարգող ԱՄՆ նախագահը երբևէ, «Պուտինի շունը չի լինի»։
Ռուսական մամուլի փոխանցմամբ, փետրվարի 22-ին, մեկնաբանելով ԱՄՆ նախագահի հերթական կոշտ հայտարարությունները, Պուտինն ասել է, թե այնուամենայնիվ Բայդենը, որպես նախագահ, ավելի նախընտրելի է Ռուսաստանի համար, քան Թրամփը։
Ըստ Պուտինի՝ Բայդենը կանխատեսելի հին դպրոցի քաղաքական գործիչ է։ Հարցին, թե ինչպե՞ս է վերաբերվում այն փաստին, որ Արևմուտքում իրեն ներկայացնում են որպես չարագործի, ՌԴ նախագահը կատակով է պատասխանել, թե «այդպես է, թող վախենան»։
Ռուսաստանի նախագահի մամուլի խոսնակ Դմիտրի Պեսկովն էլ ասել է, թե Բայդենի հնչեցրած վիրավորական հայտարարությունները վնասում են հենց Բայդենի հեղինակությանը և ավելացրել, թե «Պուտինը չի արձագանքում կոպտությանը և նուն ոճով չի պատասխանի»։
