Թայվանի հարցի լուծումը Չինաստանի ժողովրդի պատմական խնդիրն ու ձգտումն է, հայտարարել է ՉԺՀ նախագահ Սի Ծինփինը՝ ելույթ ունենալով Ժողովրդական ժողովների տանը Չինաստանի Հանրապետության առաջին նախագահ Սուն Յաթսենի (1866–1925) ծննդյան 160-ամյակին նվիրված միջոցառման ժամանակ։ Նրա խոսքերը նոյեմբերի 12-ին մեջբերում է «Սինհուա» գործակալությունը։
«Թայվանի հարցի լուծումը և ազգային լիակատար միավորման հասնելը Չինաստանի կոմունիստական կուսակցության անսասան պատմական խնդիրն են, ողջ չին ժողովրդի ընդհանուր ձգտումը և չին ազգի մեծ վերածննդի իրականացման անխուսափելի պահանջը», — նշել է ՉԺՀ առաջնորդը։
Չինաստանը թույլ չի տա Թայվանի անկախության կողմնակիցների անջատողական գործունեության որևէ դրսևորում, հայտարարել է Սի Ծինփինը։
«Նեղուցի երկու կողմերում ապրող հայրենակիցները, ինչպես նաև երկրի ներսում և արտերկրում ապրող ողջ չին ժողովուրդը պետք է համատեղեն ջանքերը՝ դիմակայելու «Թայվանի անկախության» անջատողական ուժերին և միասին աշխատեն հանուն նեղուցի երկու կողմերի միջև հարաբերությունների խաղաղ զարգացման և ազգային լիակատար միավորման հասնելու», — ընդգծել է նա։
Սի Ծինփինը նաև նշել է, որ վերամիավորման ընթացքում Պեկինը մտադիր է հաշվի առնել կղզու իրական իրավիճակը, ինչպես նաև նրա բնակիչների շահերն ու զգացմունքները։
