Միացյալ Թագավորության Համայնքների պալատի հանձնաժողովը խորապես մտահոգված է Վրաստանում ժողովրդավարության վիճակի շարունակական վատթարացմամբ, ինչը ներկայիս զարգացումների դեպքում կհանգեցնի արմատացած ավտոկրատիայի՝ Բելառուսի պես հայտնվելով Ռուսաստանի ազդեցության ոլորտում. ասված է պալատի հանձնաժողովի զեկույցում։
Հանձնաժողովը նաև դատապարտել է Վրաստանի իշխանություններին։
«Մենք դատապարտում ենք «Վրացական երազանքի» կառավարության գործողությունները՝ ԵՄ-ին անդամակցելու բանակցությունները կասեցնելու, ընդդիմության ձայները ճնշելու, օրինական բողոքի ակցիաները սահմանափակելու և ապատեղեկատվություն տարածելու համար։ Այս գործողությունները կրկնում են ռուսաստանյան սցենարը և մատնանշում Թբիլիսիի ու Մոսկվայի միջև համակարգված գործողությունները։ Մենք սատարում ենք Միացյալ Թագավորության կառավարության արդեն ձեռնարկած քայլերը՝ պատժամիջոցներ կիրառելով վրացի այն պաշտոնյաների նկատմամբ, որոնք պատասխանատու են օրինական բողոքի ակցիաների ժամանակ մարդու իրավունքների խախտումներ թույլ տալու համար»,- նշվում է զեկույցում։
