Ավերիչ ջրհեղեղներն ու սողանքները 1003 մարդու կյանք են խլել Ինդոնեզիայում։ Այս մասին շաբաթ օրը հայտնել են փրկարարները, մինչդեռ Հարավարևելյան Ասիայի երկիրը շարունակում է արտակարգ օգնության ջանքեր կիրառել, հայտնում է AFP-ն։
Վերջին երկու շաբաթվա ընթացքում Սումատրա հյուսիսարևմտյան կղզին պատած բնական աղետի պատճառով ավելի քան 5400 մարդ է տուժել, ասվում է Աղետների հետևանքների մեղմացման ազգային գործակալության վերջին զեկույցում։
Մահացու տեղատարափ անձրևները վերջին ժամանակներում Սումատրային պատուհասած ամենասարսափելի աղետներից են, որտեղ 2004 թվականին ցունամին ավերել է կղզու հյուսիսային ծայրում գտնվող Աչեհ նահանգը։
Զոհերի վերջնական թիվը, ինչպես սպասվում է, կավելանա, քանի որ աղետների դեմ պայքարի գործակալությունը հայտնում է, որ 218 մարդ դեռևս անհետ կորած է համարվում։
Հսկայական տարածքներում տուժած 1.2 միլիոն բնակիչները ստիպված են եղել ապաստան գտնել ժամանակավոր կացարաններում: Ջրհեղեղներից տուժածների շրջանում դժգոհությունն աճում է, բողոքում են օգնության տրամադրման տեմպից:
Ինդոնեզիայի նախագահ Պրաբովո Սուբիանտոն շաբաթ օրը հայտարարել է, որ իրավիճակը բարելավվել է և մի քանի շրջաններ, որոնք նախկինում մեկուսացված են եղել՝ այժմ հասանելի են։
Աղետից հետո վերականգնման ծախսերը կարող են հասնել 51.82 տրիլիոն ռուփիի (3.1 միլիարդ դոլար), իսկ Ինդոնեզիայի կառավարությունը մինչ օրս դիմադրել է միջազգային օգնության կոչերին։
