Գերմանիայից ջրային սպորտի էնտուզիաստ և բնապահպան ակտիվիստ Միխայել Վալտերը սեպտեմբերի 15-ին անսովոր ճանապարհորդության կմեկնի՝ սապսերֆինգի տախտակով կանցնի Ատլանտյան օվկիանոսը։ Նա հույս ունի դառնալ պատմության մեջ երկրորդ մարդը, ում կհաջողվի իրականացնել դա, հաղորդում է «Техкульт»-ը։ Այս նախաձեռնությունն իրականացվում է «Զրո արտանետում» նախագծին աջակցելու նպատակով, որով Վալտերը զբաղվում է վերջին 17 տարիներին։
Երթուղին անցնում է Պորտուգալիայի Լագուշ նավահանգստից դեպի Կանարյան կղզիներ, իսկ այնտեղից՝ Կանաչ հրվանդանի կղզիների միջով դեպի Ֆրանսիական Գվիանայի Կայեննա նավահանգիստ։ Ճանապարհորդության երկարությունը կազմում է շուրջ 6000 կմ, որը Վալտերը նախատեսում է անցնել երեք ամսում։ Այդ ընթացքում նա ստիպված կլինի թիակով շուրջ 4 միլիոն թափահարում կատարել, ինչի վրա մարզիկը կծախսի 600 հազար կկալ։ Նա ծովում ոչ մի աջակցություն չի ունենա, միայն կապի ալիք՝ արբանյակային հեռախոսով։
Որպես տեղաշարժման միջոց ընտրվել է մոտ 6 մետր երկարությամբ և 200 կգ քաշով Rannoch R10 օվկիանոսային թիանավակը՝ արդիականացումից հետո։ Իր հետ Վալտերը կվերցնի մոտ 500 կգ օգտակար բեռ, որը, բացի սննդից, ներառում է փրկարար լաստանավ, թվային քարտեզագիր, արտակարգ իրավիճակների ռադիոփարոս՝ դիրքի ցուցիչ (EPIRB), կայմի վրա դիրքային ստրոբոսկոպ և ոտքով կառավարվող ղեկ։ Նա ջուրը կստանա Schenker հակաօսմոսային կայանքից, իսկ էներգիան՝ արևային մարտկոցներից։
