Չի կարելի վերցնել ու համակարգչի կոճակի մի հպումով, ամբողջ Հայաստանի բժիշկներին մի ակնթարթում տուգանել։ Իր ֆեյսբուքյան էջում այսպիսի գրառում է արել Նոր Կյանքի Առողջության Կենտրոնի տնօրեն Արա Ալեքսանյանը։
Նա կոչով դիմել է այն բժիշկներին, որոնք ստացել են ծանուցում 50 000 դրամ տուգանքի մասին, կոչ անելով արձագանքել, որպեսզի միասին պայքարեն այսպիսի անօրինականությունների դեմ։
«Բոլոր մեծ և փոքր բժշկական կազմակերպությունների տնօրեններին, ովքեր պետպատվերով ուղեգրելու իրավունք ունեն, տուգանել են 50 000 դրամ։ Հետո 220 էջանոց ուղեցույց են ուղարկել և ասում են, որ այսինչ ուղեգիրն այնինչ կետի պահանջներին չի համապատասխանում։
Օրինակի համար, մարդը տևական գլխացավ, գլխապտույտ ունի, ուղարկում ենք նյարդաբանի, գրում է, որ ՀՇ-ի, կամ ՄՌՇ-ի կարիք ունի։ Գրված, հիմնարկի կնիքով հաստատված եզրակացությունը բերում տալիս է մեզ։ էլ մենք քանի՞ գլխանի ենք, որ ուղեգիր չտանք։ 220 էջը, որ դնեմ ուսումնասիրեմ, հենա ձեռի հետ էլ փաստաբան կաշխատեմ», – գրել է բուժհիմնարկի տնօրենը։
Արա Ալեքսանյանը նաև խնդրել է իր գրառումը չքաղաքականացնել։
NEWS.am Medicine–ի տեղեկություններով, առողջության առաջնային պահպանման օղակի շատ բուժհաստատություններ նախօրեին տուգանքի նմանատիպ ծանուցումներ են ստացել։ Դրանք հիմնականում վերաբերում են այսպես կոչված դժվարամատչելի հետազոտությունների՝ ԿՏ–ի կամ ՄՌՏ–ի ուղեգրմանը։
