Չվճարված հարկերը, նույնիսկ օրական մի քանի հազար դրամի չափով, վնասում են ոչ միայն հասարակությանը, այլեւ «գողին»՝ խաթարելով նրա սեփական առողջության, հաջողության եւ բարեկեցության հեռանկարները։ Այս մասին հունիսի 17-ին Ազգային ժողովի նիստում, ՀՀ 2024թ. պետական բյուջեի կատարման հաշվետվության քննարկման ժամանակ, հայտնել է ֆինանսների նախարար Վահե Հովհաննիսյանը։
Նա, մասնավորապես, առանձնացրել է շինարարության ոլորտը՝ նշելով, որ այնտեղ գործում են խմբեր, որոնք ծառայություններ են մատուցում առանց գրանցման եւ իրավական ձեւակերպումների։ «Նման գործունեությունը քրեական հանցագործություն է, որը պատժվում է մինչեւ անգամ ազատազրկմամբ»,- նշել է Հովհաննիսյանը։
Կառավարության պարտականությունն է, ըստ նախարարի, կրճատել հարկային ստվերը։ Եվ ոչ միայն ապահովել բյուջետային ֆինանսավորումը, այլեւ, առաջին հերթին, պաշտպանել հարկ վճարողների իրավունքները։ «Սա կապահովի արդարության զգացումը հասարակությունում՝ այն դարձնելով ավելի շոշափելի»,- ավելացրել է կառավարության ներկայացուցիչը։
Նա համոզված է. թվայնացման եւ արհեստական բանականության օգտագործման ընդլայնումը թույլ կտա ավելի արդյունավետորեն հայտնաբերել հարկերի վճարումներից խուսափումները։
