Էսկալացիայի վտանգի մասին խոսում են բոլորը, բացի ՀՀ բարձրաստիճան պաշտոնյաներից։ Այս մասին խորհրդարանական խմբակցությունների ճեպազրույցի ժամանակ հայտնել է ԱԺ «Պատիվ ունեմ» խմբակցության ղեկավար Հայկ Մամիջանյանը։
«Իրենք միտված են անել ամեն ինչ՝ Ադրբեջանին սպիտակեցնելու համար։ Էլ ինչու՞ են տանջվում, մամուլի հաղորդագրություններ գրում։ Թող ուղղակի շեյր անեն Ադրբեջանի Պն հայտարարությունները»,- ասել է Մամիջանյանը։
Նա նշել է, որ էսկալացիայի վտանգի մասին վերջին օրերին խոսել են նաև երկու գերտերությունների՝ Ռուսաստանի և ԱՄՆ-ի ներկայացուցիչները։
Ասում է` սահմանային տեղաշարժերի մասին ստույգ տեղեկություններ ունենալ չի կարող, սակայն միջազգային տարբեր կառույցների, գերտերություններրի բարձրաստիճան պաշտոնյաների հայտարարություններից հասկանալի է, թե որքան վտանգավոր է Հայաստանի շուրջ ստեղծված իրավիճակը։ Շեշտում է` ոչ միայն տարածաշրջանային, այլև աշխարհաքաղաքական զարգացումների առումով է վտանգավոր վիճակ ստեղծվել։
Մամիջանյանը չի բացառել, որ վարչապետ Նիկոլ Փաշինյանը կարող է գաղտնի պայմանավորվածություն ունենալ Ադրբեջանի նախագահ Իլհամ Ալիևի հետ՝ «էսկալացիա իրականացնել՝ հայ ժողովրդին վախեցնելու համար»։
