Ազգային ժողովում «Հայաստան» խմբակցության պատգամավոր Քրիստինե Վարդանյանի ելույթի ժամանակ լեզվակռիվ սկսվեց նիստը վարող ԱԺ փոխխոսնակ Ռուբեն Ռուբինյանի եւ «Հայաստան» խմբակցությունից Արթուր Խաչատրյանի միջեւ:
Վերջինս իր խմբկցության անդամի ելույթի ժամանակ տեղից ինչ-որ բաներ էր բղավում, որին արձագանքեց Ռուբեն Ռուբինյանը. «Ուրեմն լսեք ինձ, պարոն Խաչատրյան, նախ սուս մնացեք, հետո իմ հետ խոսեք հարգալից, հետո մի անցեք ձեր չափերը»:
Արթուր Խաչատրյանը հայտարարեց, որ ինքն է իր չափերը գծում:
«Ուրեմն լավ չեք գծում, ուրեմն ես կգծեմ հիմա ու հանգստացեք, հանգստացեք ասեցի, հանգստացի, հանգիստ»,-արդեն բղավելով ասաց Ռուբեն ռուբինյանը եւ նույն բարձր տոնով Քրիստինե Վարդանյանին հորդորեց շարունակել իր ելույթը:
Քրիստինե Վարդանյանն իր ելույթում հղում անելով ՔՊ-ական պատգամավորներին շփոթեց երկու պատգամավորներին և ասաց. «Չեմ հիշում Մարիա Կարապետյանը, թե Սոնա Ղազարյանը, շատ տարբերություն չկա»:
Ռուբինյանը կոչ արեց հարգալից խոսել պատգամավորների մասին. «Դուք էլ տեղից լռեք, պարոն Մինասյան»,-ասաց նա դիմելով «Հայաստան» խմբակցության քարտուղար Արծվիկ Մինասյանին, ով տեղից ինչ-որ բան էր բղավում:
