Հայաստանի մարմնամարզության առաջնությունում ինձ համար հետաքրքիր էին հատկապես երիտասարդների ելույթները. Հակոբ Սերոբյան

Հենացատկում Արթուր Դավթյանին փոխարինող դեռ չեմ տեսնում: Թուրքիայում նրա հաղթանակը շատ լավ ընդունվեց։ Թուրքիայի մարմնամարզության ֆեդերացիան շատ ուրախ էր, որ անձամբ Արթուր Դավթյանը մասնակցում է իրենց մրցումներին։

Այս մասին լրագրողների հետ զրույցում ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:

Մարտի 28-29-ը Երեւանի Ալբերտ Ազարյանի եւ Հրանտ Շահինյանի անվան մարզադպրոցներում անցկացվեց սպորտային մարմնամարզության Հայաստանի մեծահասակների առաջնությունը, որին մասնակցեց 36 մարմնամարզիկ՝ 18 տղա, 18 աղջիկ:

Հայաստանի չեմպիոնները որոշվեցին 6 առանձին գործիքներում եւ բազմամարտում: Մեծահասակների հետ մրցումներին մասնակցեցին նաեւ երիտասարդ մարմնամարզիկներ:

«Ինձ այս առաջնությունում հետաքրքրում էր երիտասարդների մասնակցությունը եւ նրանց ցույց տված արդյունքները մեծահասակներում: Փարիզի Օլիմպիական խաղերից հետո սպորտային մարմնամարզության կանոնադրությունը փոխվել է եւ ինձ հետաքրքրիր էր, թե ինչպիսին կլինի երիտասարդների արդյունքները նոր կանոնադրությունով: Արդարացրին: Համլետ Մանուկյանը վատառողջ էր եւ մասնակցեց միայն իր հիմնական գործիքի վրա: Շատ լավ կատարեց իր վարժությունը եւ դարձավ նժույգ թափեր վարժության հաղթող: Ուրախ եմ Մամիկոն Խաչատրյանի համար, նա բացարձակ չեմպիոն դարձավ մի քանի գործիքների վրա։

Համլետ Մանուկյանը, Մամիկոն Խաչատրյանը եւ Գագիկ Խաչիկյանը կպատրաստվեն մեծահասակների Եվրոպայի առաջնությանը: Նրանք կմասնակցեն բազմամարտում, թիմային պայքարում կլինենք: Շեշտը չենք դնում կոնկրետ թիմային պայքարի վրա, բայց երիտասարդների թիմային մասնակցությունը մեզ համար կլինի փորձ 2027թ. Երեւանում անցկացվելիք Եվրոպայի առաջնությանը պատրաստվելու համար:

Հիմնական գործիքների վրա կմասնակցեն մեր ուժեղագույնները: Օղակների վարժությունում կմասնակցի Վահագն Դավթյանը, Արթուր Ավետիսյանը, հենացատկ՝ Արթուր Դավթյան: Եվրոպայի առաջնությունում մասնակիցների մեջ կա մրցակցություն:

Ունենք 8 լավ տղաներ, բայց իրավունք ունենք մասնակցել 6-ով: Այն երկուսը, ովքեր դուրս կմնան մրցակցությունից, նրանց հնարավորություն կտանք մասնակցել Challenge Cup-երին:

Հենացատկում Արթուր Դավթյանին փոխարինող դեռ չեմ տեսնում: Երիտասարդների Եվրոպայի չեմպիոն Էրիկ Բաղդասարյանը կարողանում է լավ ցատկեր կատարել: Հուսամ, որ նա կավելացնի եւ կկարողանա ավելի լավ ցատկեր անել: Արթուրն այս պահին դեռ անփոխարինելի է:

Ավելի մեծ են հույսերս նժույգ թափերի վարժությունում: Ունենք արդեն ընդգծված առաջատարներ՝ Համլետ Մանուկյան եւ Մամիկոն Խաչատրյան: Նրանց մասին արդեն ամբողջ աշխարհը գիտի: Օրինակ, երբ գնացել էինք Գերմանիա մրցումների, Համլետ Մանուկյանն ու Մամիկոն Խաչատրյանն ուշադրության կենտրոնում էին, այնտեղ մեծ ճանաչում ունեն: Միջազգային ֆեդերացիայից թույլտվություն հարցրին նրանցից հարցազրույց վերցնելու համար: Երեւի այս ուշադրությունը եղավ պատճառը, որ որակավորման փուլում շատ լավ մասնակցեցին, եզրափակիչում վատ հանդես եկան:

Նախատեսում ենք երկու մարմնամարզիկներին էլ տանել աշխարհի գավաթի խաղարկության հաջորդ փուլերին: Նրանք ունեն մեծ ներուժ եւ կարող են շատ լուրջ մրցակցություն ապահովել մեծահասակների պայքարում»,- ասաց Հակոբ Սերոբյանը:

Անդրադառնալով Անթալիայում անցկացված աշխարհի գավաթի խաղարկության հերթական փուլում Արթուր Դավթյանի հաղթանակին, գլխավոր մարզիչի խոսքով, Թուրքիայում Արթուր Դավթյանի հաղթանակը մեծ արձագանքների է արժանացել:

«Միշտ ասում եմ, որ եթե Թուրքիայում մասնակցում ենք մրցաշարի, ավելի մեծ պատասխանատվությամբ պետք է մոտենանք: Անթալիայի փուլին մասնակցեցին Արթուր Դավթյանը եւ Վահագն Դավթյանը: Եթե անկեղծ, Վահագն Դավթյանն ամաչեց իր կատարած վարժությունից: Ուղղակի հոգնած էր, չէր վերականգնվել: Արթուր Դավթյանն արդարացրեց: Բոլորը շատ գոհ էին եւ ուրախ: Թուրքիայի մարմնամարզության ֆեդերացիան շատ ուրախ էր, որ Արթուր Դավթյանը մասնակցում է իրենց մրցումներին: Բոլորիս շատ ուրախացրեց Արթուրի հերթական հաղթանակը Թուրքիայում»,- նշեց Հակոբ Սերոբյանը:

Գլխավոր մարզիչը մանրամասնեց, որ մայիսին անցկացվելիք Եվրոպայի առաջնությանը Հայաստանի թիմն առաջին անգամ պատրաստվելու է Գերմանիայում:

«Առաջին անգամ Գերմանիայի հավաքականի հրավերով համատեղ հավաք ենք անցնելու այնտեղ: Գերմանիայի թիմը ցանկություն հայտնեց, որ համատեղ անցնենք հավաքը, որը կլինի մայիսի 12-23-ը Բեռլինում: Ի դեպ, այս հավաքի համար մեզ շատ լավ զեղչեր են արել, դահլիճի համար ընդհանրապես գումար չեն ուզել: Զարմացած եմ: Եվրոպայի առաջնությունն անցկացվելու է Գերմանիայի մեկ այլ քաղաքում՝ Լայպցիգում: Մեզ համար սա լավագույն հնարավորությունն է շատ լավ զեղչերով հավաք ունենալ այն նույն երկրում, որտեղ լինելու է մրցաշարը: Բնական է, որ այս պարագայում ավելի լավ կմասնակցենք»,- ասաց Հակոբ Սերոբյանը:

Լրահոս

Օրացույց

Ապրիլի 2025
Ե Ե Չ Հ Ու Շ Կ
 123456
78910111213
14151617181920
21222324252627
282930