Արգենտինայի նախագահ Խավիեր Միլեին Մերիլենդում Պահպանողական քաղաքական գործողությունների համաժողովում Իլոն Մասկին ոսկեպատ շղթայավոր սղոց է նվիրել:
Մասկն այն անվանել է «բյուրոկրատիայի սղոց»:
Սղոցի շեղբին փորագրված է «Viva la libertad, carajo» կարգախոսը, որը բառացի թարգմանաբար նշանակում է «Կեցցե ազատությունը, գրողը տանի»:
Արգենտինայի նախագահն այս արտահայտությունն օգտագործել է որպես կարգախոս 2021 թվականի խորհրդարանական և 2023 թվականի նախագահական ընտրությունների ժամանակ։
Արգենտինայի նախագահի գրասենյակից հայտնել են, որ սղոցը Միլեի աշխատասենյակում կախվածի ճշգրիտ կրկնօրինակն է: Ինքը՝ նախագահը, նախընտրական քարոզարշավի ժամանակ սղոց է տարել՝ ցույց տալով, որ ցանկանում է կրճատել պետական ապարատի ծախսերը։
Կառավարության արդյունավետության դեպարտամենտը (DOGE), որն այժմ ղեկավարում է Իլոն Մասկը, ներկայումս զբաղվում է հենց այս «կառավարական բյուրոկրատիայի ապամոնտաժմամբ»:
