ԱՄՆ նախագահ Դոնալդ Թրամփի վարչակազմը կարող է փակել մի քանի հյուպատոսություններ ամբողջ աշխարհում՝ պետդեպարտամենտի ծախսերը կրճատելու համար։ Այս մասին երեքշաբթի հայտնել է NBC հեռուստաալիքը՝ հղում կատարելով աղբյուրներին։
Նրանց տեղեկացմամբ՝ խոսքը խաղաղօվկիանոսյան կղզիներում, Կանադայում եւ Մեքսիկայում, ինչպես նաեւ Եվրոպայում, մասնավորապես Գերմանիայում եւ Ֆրանսիայում հյուպատոսությունների մասին է։ NBC-ն նշել է, որ Թրամփն արդեն ծանոթացել է այս նախաձեռնությանը, սակայն դրա իրականացման ժամկետների մասին որոշում դեռ չի կայացվել։ Պետդեպարտամենտ իր հերթին հյուպատոսություններից տեղեկատվություն է խնդրել իրենց գործունեության մասին։
Հունվարի 20-ին Թրամփի երդմնակալությունից անմիջապես հետո միլիարդատեր Իլոն Մասկի Կառավարության արդյունավետության բարձրացման դեպարտամենտը (DOGE) սկսել է ԱՄՆ բյուջեի ծախսերի մասշտաբային աուդիտ։ Ընդհանուր առմամբ, գործարարն ակնկալում է պետական ծախսերը կրճատել 2 տրլն դոլարով։
