Բաշար ալ Ասադի կինը ցանկանում է բաժանվել ամուսնուց և հեռանալ Ռուսաստանից:
Այս մասին հայտնում են թուրքական և արաբական լրատվամիջոցները։ Ըստ աղբյուրների՝ Ասման դժգոհ է Պուտինի հովանավորությամբ Ռուսաստանում իր նոր կյանքից և ցանկանում է տեղափոխվել Լոնդոն։ Ընդամենը երկու շաբաթ առաջ Սիրիայի բռնապետ Ասադը ընտանիքի հետ փախավ Մոսկվա, երբ ապստամբները հասան մայրաքաղաք Դամասկոս և նրա պալատ:
Ըստ տեղեկությունների՝ Ասմա ալ-Ասադը, հարկադրված տեղափոխվելուց հետո, ռուսական դատարանից հատուկ թույլտվություն է խնդրել Մոսկվայից հեռանալու համար։ Նրա խնդրանքը, ըստ երևույթին, ներկայումս քննարկվում է Ռուսաստանի իշխանությունների կողմից:
Բացի սիրիացի լինելուց, Ասմա ալ-Ասադը նաև բրիտանական քաղաքացիություն ունի։ Նա ծնվել է 1975 թվականին Լոնդոնում։ 2000 թվականին նա տեղափոխվել է Սիրիա և 25 տարեկանում ամուսնացել Բաշար ալ Ասադի հետ։
Ինքը՝ Ասադը, ապրում է ռուսական ապաստանում՝ խիստ սահմանափակումների տակ. ապաստանի խնդրանքը բավարարվել է, սակայն նրան արգելվում է լքել Մոսկվան կամ զբաղվել քաղաքական գործունեությամբ։ Ավելին, ռուսական իշխանությունները, ըստ տեղեկությունների, սառեցրել են նրա ակտիվները։ Ակտիվների թվում են 270 կիլոգրամ ոսկի, երկու միլիարդ դոլար և 18 բնակարան Մոսկվայում։
