«Մեր հավաքական սոցիալ-հոգեբանությունը էականորեն ապապետական է»:
Այս մասին Ազգային ժողովում 2025 թվականի պետբյուջեի նախագծի քննարկման ժամանակ ասաց վարչապետ Նիկոլ Փաշինյանը:
«Կամ մեր ենթագիտակցությունն է ապապետական: Երբեմն այն, ինչ ասում ենք, այն, ինչ պնդում ենք, ինչին հավատում ենք, երբեմն կամ հաճախ, կամ գրեթե միշտ այս կամ այն չափով իր վրա կրում է ապապետականության անտեսանելի կնիքը. խոսքը բոլորիս մասին է: Սա ասում եմ նաև, որովհետև մեր ինքնաճանաչման համար սա առանցքային գործոն է, իսկ ինքնաճանաչումը առանցքային գործոն է մեր կենսական օրակարգը ճանաչելու համար, իսկ կենսական օրակարգը ճանաչելը կարևոր է զարգացումն ու առաջընթացը ապահովելու՝ պետության հարատևությունը երաշխավորելու համար:
Իսկ ինչո՞ւ է կարևոր պետության հարատևությունը, որովհետև միայն պետությունն է մեր ազգային ինքնության զարգացման ու պահպանման գրավականը, ու այդպես եղել է միշտ, և մենք նույնիսկ սա մինչև վերջ և ամբողջական չենք գիտակցել: Կա՛ պետություն՝ մենք կլինենք որպես հայ ժողովուրդ, չկա՛ պետություն՝ մենք չենք լինի որպես հայ ժողովուրդ»,- ասաց վարչապետը:
