Միասնական տոմսային համակարգին անցնելիս, հուսով եմ, որ մինչև հունվարի մեկը մենք հարյուր տոկոսանոց անկանխիկ վճարելուն կմոտենանք, նաև ակտիվ քննարկում ենք ունեցել ԿԲ-ի հետ, շատ շուտով պետք է լուծվի բանկային քարտով վճարումների խնդիրը, այս մասին Երևանի քաղաքապետարանի գործակարգավարական նիստի ժամանակ հայտարարեց քաղաքապետ Տիգրան Ավինյանը։
Նա նաև նշեց, որ այս ընթացքը ցույց է տալիս, որ միասնական տոմսային համակարգի վերաբերյալ ընկալումն ընդհանուր առմամբ երևանցիների մոտ կա, և բոլոր խնդիրներով հանդերձ՝ այս համակարգը միանշանակ այն ուղղությունն է, որը այլընտրանք չունի։
«Մենք շուտով ավագանու նիստում անդրադառնալու ենք արտոնյալ խմբերին, որոնք ունենալու են հանրային տրանսպորտից օգտվելու զեղչային համակարգ»,- ասաց Ավինյանը:
Ըստ Ավինյանի՝ զեղչային համակարգը կիրառելու են այն մարդկանց համար, որոնք իրապես դրա կարիքն ունեն, առաջիկա նիստերից մեկում էլ ընդունելու են արտնությունների փաթեթը:
Նա նշեց, որ ամբողջական անցումը պետք է մինչև դեկտեմբեր ապահովել:
«Հընթացս նոր վճարման մեթոդներ են առաջանալու: Մենք պարբերաբար կքննարկենք և, միգուցե, մեր քաղաքականության մեջ կրկին փոփոխություններ անենք, ինչպես արեցինք նոյեմբերի 1-ից»,- ասաց քաղաքապետը։
Քաղաքապետը համոզմունք հայտնեց, որ անկանխիկ մեթոդը բերում է թափանցիկության:
