Վրաստանի իշխող «Վրացական երազանք» կուսակցության 81 պատգամավոր ստորագրել է նախագահ Սալոմե Զուրաբիշվիլիի իմպիչմենտի պահանջով փաստաթուղթը։
Ինչպես հայտնել են վրացական լրատվամիջոցները, Վրաստանի խորհրդարանի ընթացակարգային հարցերի և կանոնակարգերի հանձնաժողովի նիստում քննարկվել և հաստատվել է պատգամավորների ստորագրությունների վավերականությունը։
«Վրացական երազանք»-ը Սալոմե Զուրաբիշվիլիին մեղադրում է Վրաստանի Սահմանադրության 52-րդ հոդվածի «Ա» ենթակետը խախտելու համար, ըստ որի՝ երկրի նախագահն արտաքին հարաբերություններում իր ներկայացուցչական լիազորություններն իրականացնում է երկրի կառավարության համաձայնությամբ։
«Վրացական երազանք»-ի մեծամասնությունը փորձում է երկրորդ անգամ իմպիչմենտի միջոցով պարտադրել Սալոմե Զուրաբիշվիլիի հրաժարականը:
Գործընթացն ավարտին հասցնելու համար անհրաժեշտ է Վրաստանի խորհրդարանի 100 պատգամավորի աջակցությունը։
Դեռ հոկտեմբերի 16-ին էր Վրաստանի վարչապետ Իրակլի Կոբախիձեն հայտարարել նախագահ Սալոմե Զուրաբիշվիլիի մոտալուտ հրաժարականի մասին՝ իմպիչմենտի միջոցով:
Ավելի վաղ հայտնել էինք, որ Թբիլիսիում ընթանում է «Վրաստանն ընտրում է Եվրամիությունը» ընդդիմության հանրահավաքը, որին միացել է նաև Վրաստանի նախագահ Սալոմե Զուրաբիշվիլին։
Հիշեցնենք, որ հոկտեմբերի 26-ին Վրաստանում տեղի կունենան խորհրդարանական ընտրություններ:
