ԱՄՆ նախագահի հանրապետական թեկնածու Դոնալդ Թրամփի նախընտրական շտաբի ներկայացուցիչները հայտնել են, որ ամերիկյան հետախուզությունը նախկին նախագահին զգուշացրել է Իրանից իր կյանքին սպառնացող վտանգի մասին։
Ըստ շտաբի տարածած հայտարարության՝ Թրամփին տեղեկացրել են «Իրանից եկող սպանության իրական և կոնկրետ սպառնալիքների մասին՝ նպատակ ունենալով ապակայունացնել Միացյալ Նահանգները և քաոս սերմանել երկրում»։
Հայտարարությունում չի պարզաբանվում, թե արդյոք դրանք նոր սպառնալիքներ են, թե՞ նախկինում արդեն հաղորդվել է:
Իրանի իշխանությունները չեն արձագանքել BBC-ի խնդրանքին՝ մեկնաբանելու այս հայտարարությունը։ Նախկինում Թեհրանը բազմիցս մերժել է ԱՄՆ-ի գործերին միջամտելու Իրանի փորձերի վերաբերյալ Վաշինգտոնի մեղադրանքները։
Թրամփը X սոցիալական ցանցում (նախկինում՝ Twitter) գրել է, որ «Իրանը լրջորեն սպառնում է իր կյանքին»։
«Հետախուզությունը պարզել է, որ կայուն և համակարգված հարձակումները (Թրամփի դեմ) ուժեղացել են վերջին մի քանի ամիսների ընթացքում», — ասել է Թրամփի նախընտրական շտաբի հաղորդակցության գծով տնօրեն Սթիվեն Չենը:
«Բոլոր գերատեսչությունների իրավապահ մարմինների աշխատակիցներն աշխատում են ապահովելու, որ նախագահի թեկնածուն մնա անվտանգ, և ընտրություններն անցկացվեն առանց արտաքին միջամտության», — ասել է Չենը:
