Զիմբաբվեի շրջակա միջավայրի նախարարությունը հայտնել է, որ երկիրն այժմ «ավելի շատ փղեր ունի, քան իրեն պետք է»: Արդյունքում, ZimParks Wildlife Park-ի ղեկավարությանը հանձնարարվել է ընտրել այն կենդանիներին, որոնք կսպանվեն: Պաշտոնյաները նշում են, որ այս քայլը կօգնի վերահսկել արագ աճող փղերի պոպուլյացիան, ինչպես նաև կհեշտացնի ծայրահեղ երաշտի հետևանքները: Հաղորդում է BILD-ը։
ZimParks արգելոցի ղեկավար Ֆուլթոն Մանգվանյան AFP-ին ասել է, որ իշխանությունները մտադիր են ազատվել ընդհանուր առմամբ 200 փղից։ Ընդհանուր առմամբ, Զիմբաբվեում ապրում է մոտ 100 հազար փիղ, երկիրը համարվում է այս կենդանիների թվով երկրորդ պոպուլյացիան Բոտսվանայից հետո։ Վերջին անգամ Զիմբաբվեում փղերի վրա կրակել են 1988 թվականին։
Ավելի վաղ Նամիբիան հայտարարել էր 700 վայրի կենդանիների, այդ թվում՝ փղերի և գետաձիերի ոչնչացման մասին՝ վերջին տասնամյակների ընթացքում ամենասարսափելի երաշտի պատճառով։ Նամիբիայի շրջակա միջավայրի նախարարությունը հայտնել է, որ արդեն սպանվել է մոտ 160 կենդանի։
Այս միջոցը նախատեսված է ջրի պաշարների սպառումը քչացնելու և երաշտի պատճառով սովահար լինող հազարավոր մարդկանց մսով ապահովելու համար: Կառավարության հրամանը խիստ քննադատության է ենթարկվել կենդանիների իրավունքների պաշտպանների կողմից:
Զիմբաբվեն և Նամիբիան հարավային Աֆրիկայի երկրներից են, որոնք արտակարգ դրություն են հայտարարել երաշտի պատճառով։
