Սեպտեմբերի 4-9-ը Մոսկվայում անցկացվում է աշխարհի 6-րդ չեմպիոն Միխայիլ Բոտվիննիկի գավաթը:
Մրցաշարին մասնակցում են 9 թիմեր, որոնք ներկայացնում են Հայաստանը, Ռուսաստանը, Բելառուսը, Ղազախստանը, Ղրղզստանը, Ադրբեջանը, Թուրքմենստանը, Ուզբեկստանը և Տաջիկստանը: Թիմերը կազմված են ավագից և մինչև 14 տարեկան չորս շախմատիստներից:
Մրցաշարն անցկացվում է շրջանային մրցակարգով, որում յուրաքանչյուր թիմի ավագ միաժամանակյա խաղի սեանս է անցկացնում հակառակորդ թիմի երիտասարդ շախմատիստների հետ:
Հայաստանի թիմի ավագն է գրոսմայստեր Վահե Բաղդասարյանը, իսկ պատանիները՝ Մանվել Առաքելյանը, Վոլոդյա Թորոսյանը, Գոռ Ասկանազյանը և Սոնա Կրկյաշարյանը:
