Վրաստանի վարչապետ Իրակլի Կոբախիձեն կառավարության վարչակազմում կայացած մամուլի ասուլիսում «ռուսական օրենքի» դեմ բողոքի ցույցերը հեղափոխության փորձ է որակել:
Այս մաին հայտնում է «Ալիք»-ը:
Նա ընդգծել է, որ 2020 թվականից սկսած Հասարակական կազմակերպությունների մասնակցությամբ կառավարությունը հեղափոխության 2 անհաջող փորձ է տեսել։
Վարչապետ Կոբախիձեն բացի այդ նաև ՀԿ-ներին մեղադրել է հետազոտություններում տվյալներ կեղծելու մեջ.
«Նրանք կեղծել են արձանագրությունների տվյալները, կեղծել են ԿԸՀ-ի կողմից ընտրությունների արդյունքների ուշ հրապարակման մասին տեղեկությունները։ ՀԿ-ների այս կեղծիքն ամբողջությամբ ֆինանսավորվել է արտասահմանյան աղբյուրներից»,- նշել է Կոբախիձեն։
Ապրիլի 17-ին Վրաստանի խորհրդարանը առաջին ընթերցմամբ հավանություն է տվել «Օտարերկրյա ազդեցության թափանցիկության մասին» օրինագծին, որին դեմ են արտահայտվել նախագահ Սալոմե Զուրաբիշվիլին, ընդդիմությունը և արևմտյան դիվանագետները՝ այն համարելով Եվրամիությանը՝ հանրապետության ինտեգրման խոչընդոտ։
Ապրիլի 15-ից Թբիլիսիում ընդդիմադիրներն ու քաղաքացիական ակտիվիստները բողոքի ակցիաներ են անցկացնում օրինագծի դեմ։
Վրաստանի խորհրդարանը մայիսի 1-ին երկրորդ ընթերցմամբ ընդունել է «Օտարերկրյա գործակալների մասին» օրենքը։
Ավելի վաղ հայտնել էինք, որ Վրաստանի խորհրդարանում՝ լիագումար նիստի մեկնարկից առաջ, որտեղ պետք է շարունակվեր «Օտարերկրյա գործակալների մասին» օրինագծի քննարկումը, ընդդիմության և խորհրդարանական մեծամասնության անդամների միջև ծեծկռտուք էր տեղի ունեցել:
Ապրիլի 30-ին Թբիլիսիում տեղի էր ունեցել հերթական ակցիան ընդդեմ «Օտարերկրյա գործակալների մասին» օրենքի։ Երեկոյան ցուցարարների հետ բախումների ժամանակ ոստիկանները օգտագործել էին պղպեղի գազ, ջրցան մեքենաներ և ռետինե փամփուշտներ, որպեսզի նրանք դուրս գան Ռուսթավելի պողոտայից, որտեղ գտնվում է խորհրդարանը:
Վրաստանի ՆԳՆ-ն հայտնել էր, որ բողոքի ակցիայի ժամանակ 63 անձ բերման էր ենթարկվել, իսկ 6 ոստիկան՝ վիրավորվել։