Իրանի Իսլամական հեղափոխության պահապանների կորպուսի (ԻՀՊԿ) ռազմածովային ուժերը լցանավի հետ կապված միջադեպից հետո նախազգուշացրել են չփորձել անցնել Հորմուզի նեղուցով, որի փակման մասին հայտարարվել էր ավելի վաղ, փոխանցել է իրանական «Ալ-Ալամ» արբանյակային հեռուստաալիքը։
«Մենք շարունակում ենք վերահսկել Հորմուզի նեղուցը և վճռականորեն կգործենք ցանկացած նավի նկատմամբ, որը կփորձի անցնել նեղուցով», — նշվել է հաղորդագրության մեջ՝ հղում կատարելով ԻՀՊԿ հրամանատարությանը։
Հեռուստաալիքի տվյալներով՝ ավելի վաղ իրանցի զինվորականները կրակ էին բացել, որպեսզի թույլ չտան լցանավին հատել Հորմուզի նեղուցը։ Միջադեպը տեղի է ունեցել Իրանի հարավում գտնվող Սիրիկ քաղաքի ափերի մոտ, որտեղ, ինչպես հաղորդվել էր, պայթյուններ էին որոտացել։
Հինգշաբթի Իրանի Պարսից ծոցի վերահսկողության վարչությունը (PGSA) հաստատել է Հորմուզի նեղուցը մինչև նոր ծանուցում բոլոր նավերի համար փակելու մասին որոշումը։
