««Դե մնայիք, կռվեիք, չգայիք, չտայիք» խոսույթին լուրջ չեմ վերաբերվում, քանի որ նման արտահայտություն անող մարդիկ չեն կարող իրենց լուրջ անձնավորություն համարել։ Այս մասին Եռաբլուրում լրագրողների հետ զրույցում ասել է Սամվել Շահրամանյանը։
«2020 թվականի պատերազմից հետո, երբ Հայաստանի, Ադրբեջանի և Ռուսաստանի ղեկավարները ստորագրեցին հրադադարի փաստաթուղթը, եթե հնարավոր լիներ շարունակել պայքարը, տրամաբանական էր, որ դա պետք է արվեր հենց այդ ժամանակ։ Դրանից հետո Ադրբեջանին արդեն փոխանցվել էին շրջաններ, ռազմավարական դիրքեր, իսկ Շուշիում տեղակայված էին ադրբեջանական զորքերը։ Այս իրավիճակում խոսել, թե պետք է մնալ ու կռվել, լուրջ չէ»,-ասել է նա։
Ադրբեջանում թողնված զենքի մասին հարցին Շահրամանյանը պատասխանեց, որ այժմ նպատակահարմար չի խոսել այդ թեմայով․ «Ժամանակը կգա, կխոսեմ այդ մասով։ Քրեական գործ է հարուցված, որի շրջանակում ես արդեն հարցաքննվել եմ որպես վկա և տվել եմ անհրաժեշտ պատասխանները»,– ընդգծեց Արցախի նախագահը։
