Ֆրանսիայի նախագահ Էմանուել Մակրոնը կարծում է, որ Իրանում իշխանությունը դրսից ուժով փոխելու ցանկությունը ռազմավարական սխալ է։
«Յուրաքանչյուր ոք, ով կարծում է, որ հնարավոր է փրկել երկիրը նրա կամքին հակառակ՝ դրսից հարվածելով, միշտ սխալվել է»,- լրագրողներին ասել է Մակրոնը Կանադայում կայացած «Յոթի խմբի» (G7) գագաթաժողովի շրջանակում։
Նրա խոսքով՝ «բոլոր նրանք, ովքեր անցյալում փորձել են փոխել ռեժիմները հարվածների կամ ռազմական գործողությունների միջոցով, ռազմավարական սխալ են թույլ տվել»։ «Դա մեզ է ցույց տալիս փորձը»,- ընդգծել է Ֆրանսիայի առաջնորդը։
Մեկնաբանելով Իսրայելի եւ Իրանի միջեւ առճակատումը՝ Ֆրանսիայի նախագահը կոչ է արել երկու կողմերին դադարեցնել քաղաքացիական թիրախների վրա հարձակումները։ «Անհրաժեշտ է, որ դադարեցվեն էներգետիկ ենթակառուցվածքների, մշակութային եւ վարչական օբյեկտների եւ հատկապես քաղաքացիական անձանց դեմ բոլոր հարձակումները»,- ասել է Մակրոնը։
