Աշխարհում տեղի ունեցողը հստակ ցույց է տալիս այդ պատերազմի դասերի և խորհրդային ժողովրդի հաղթանակի արդիականությունը։ Նման հայտարարություն է արել ՀՀ-ում Ռուսաստանի Դաշնության արտակարգ և լիազոր դեսպան Սերգեյ Կոպիրկինը, որը մասնակցում է Երևանում ընթացող «Անմահ գունդ» երթին։
«Սա արդիական է թե՛ քաղաքական, թե՛ բարոյական առումով։ Մոռանալով մեր նախնիների սխրանքը պատմության դասերը՝ մենք մեզ դատապարտում ենք ողբերգությունը կրկնելուն»,- ընդգծել է դեսպանը։ Նա հավելել է, որ մեր ժողովուրդների համար, յուրաքանչյուր մարդու համար սա անձնական տոն է, քանի որ մեր երկրներում՝ ԽՍՀՄ նախկին հանրապետություններում, հավանաբար չկա մի ընտանիք, որը չի տուժել պատերազմից, և շատ կարևոր է, որ շատ երիտասարդներ են գալիս։
Նրա խոսքով՝ սա, նախնիների սխրանքի հիշատակից զատ, սերունդների միջև կապ է, այն միջուկը, որը մարդկանց օգնում է հաջողության հասնել բարդ աշխարհում։
Պատասխանելով հարցին, թե ինչ պետք է անել համաշխարհային պատերազմների կրկնությունից խուսափելու համար, դեսպանը նշել է. «Այժմ ակտիվացել են ջանքերը՝ պատերազմի արդյունքները վերանայելու, պատմությունը վերաշարադրելու և մարդկության դեմ սարսափելի հանցագործություններ կատարածներին արդարացնելու համար: Ոմանք կցանկանային, որ մենք մոռանայինք մեր նախնիների սխրանքները: Բայց մենք պարտավոր ենք պաշտպանել ճշմարտությունը, և հենց ճշմարտության համար պայքարն է, որ կօգնի մեր առջև ծառացած խնդիրները լուծելուն»:
Հայ-ռուսական հարաբերությունների վերաբերյալ, որոնք բարդ ժամանակաշրջան են ապրում, դիվանագետը ընդգծեց, որ դրանք հիմնված են խոր, ամուր կապերի վրա։ Ժողովուրդներին միավորում են պատերազմում տարած ընդհանուր հաղթանակը, մեր նախնիների սխրանքը և մեր ժողովուրդների զոհաբերությունները։ «Ահա թե ինչու է շատ կարևոր, որ Հայաստանում, Ռուսաստանում և այլ երկրներում պահպանենք հիշողությունը։ Հաճելի է տեսնել այդքան շատ մարդկանց՝ իրենց նախնիների դիմանկարներով։ Սա լավատեսության առիթ է տալիս՝ չնայած մեր առջև ծառացած խնդիրներին»,- եզրափակեց դեսպանը։
