Չնայած Թրամփի քաղաքականությանը և Իրանի դեմ հնչող անվերջ սպառնալիքներին, ես չեմ կարծում, որ իրական պատերազմ կլինի։ Այս մասին ապրիլի 3-ին լրագրողների հետ զրույցում ասաց քաղաքագետ Ալեքսանդր Իսկանդարյանը։ Միաժամանակ, իր գնահատմամբ՝ Իրանին անհրաժեշտ է ջանքեր գործադրել դիրքերը պահպանելու, այլ ոչ թե դրանք ավելացնելու համար։
«Այժմ ժամանակաշրջանը չափազանց բարդ է: Ես նկարտի ունեմ ոչ միայն Հարավային Կովկասի, այլև Իրանի համար: Տարածաշրջանի կոնֆիգուրացիան փոխվում է, Թուրքիան ուժեղանում է ոչ միայն Հարավային Կովկասում, այլ նաև Մերձավոր Արևելքում: Այս պայմաններում Իրանի համար շատ կարևոր է առնվազն չկորցնել դիրքերն իր շուրջ: Հավանաբար դրանով է բացատրվում Թեհրանի վարած քաղաքականությունը։ Իրադարձությունների հետագա զարգացումը կախված է բազմաթիվ գործոններից՝ սկսած ուկրաինական պատերազմից մինչև Միացյալ Նահանգների դիրքորոշումը»,- ասաց Իսկանդարյանը։
Նրա խոսքով՝ Իրանը փորձում է միաժամանակ պահպանել հարաբերությունների մակարդակը Հայաստանի և Ադրբեջանի հետ։
«Իրանի համար սրանք շատ տարբեր երկրներ են, շատ տարբեր հարաբերություններով, բայց երկու երկրներն էլ կարևոր են Թեհրանի համար: Եթե չեմ սխալվում, չնայած մեր քաղաքական վերնախավի գաղափարական բոլոր նախապատվություններին, նրանք դեռևս ունեն այն գաղափարը, որ Իրանի հետ պետք է արժանապատիվ հարաբերություններ պահպանվեն»,- հավելել է փորձագետը:
