Հայաստանի ԱԳՆ-ն նախաձեռնել է ՅՈՒՆԵՍԿՕ-ի հետ համագործակցությամբ կազմակերպել Զինված հակամարտությունների ժամանակ մշակութային օբյեկտների պաշտպանության վերաբերյալ Հաագայի 1954թ. կոնվենցիայի 70-ամյա տարեդարձին նվիրված միջազգային հանդիպում:
Միջոցառման անցկացման ծախսերի նախնական գնահատականը կազմում է 34,8 մլն դրամ, որի վերաբեռրյալ կառավարությունն իր այսօրվա նիստում որոշում կայացրեց:
Հաշվի առնելով, որ Հայաստանը ներկայացրել է իր թեկնածությունը՝ անդամակցելու ՅՈՒՆԵՍԿՕ-ի Համաշխարհային ժառանգության կոմիտեին, միջոցառման անցկացումը լավ հնարավորություն է հանդիսանում՝ ներկայացնելու Հայաստանի կարողությունները նոր տեխնոլոգիաների կիրառմամբ մշակութային ժառանգության օբյեկտների պահպանության ոլորտում և դրանով իսկ ապահովելու ՄԱԿ անդամ երկրների աջակցությունը Հայաստանի թեկնածությանը:
Միջոցառման անցկացումը նաև հնարավորություն կտա ուշադրություն հրավիրելու Լեռնային Ղարաբաղում հայկական մշակութային ժառանգության պաշտպանության խնդրի վրա:
Միջոցառման անցկացման ծախսը կազմել է 20,211.8 հազար դրամ, որը ներառում է ժամանող հյուրերի ավիատոմսեր (6,234.9 հազար դրամ), հյուրանոցային ծառայություն (1208.0 հազար դրամ), տրանսպորտի վարձակալություն (60 հազար դրամ), դահլիճի վարձակալություն, բեմի կահավորում, ձայնային, լուսարձակման նկարահանման աշխատանքներ, օդանավակայանում պատվիրակության դիմավորում- ճանապարհում, նվերների տրամադրում, (10,793.7 հազար դրամ), սննդի կազմակերպում (1195.4 հազար դրամ), պաշտոնական ճաշի կազմակերպում (469.8 հազար դրամ), նյութերի տպագրություն (250.0 հազար դրամ):
Բացի այդ, 2024 թվականի դեկտեմբերի 18-19-ին Հայաստանը հյուրընկալելու է Հնագույն քաղաքակրթությունների ֆորումի նախարարական հանդիպումը, ինչը պայմանավորված է կառույցի՝ ՀՀ նախագահությամբ: Ֆորումի նախագահությունը հնարավորություն կտա ներկայացնելու Հայաստանի մոտեցումները խաղաղության մշակույթի, միջմշակութային երկխոսության, հնագույն քաղաքակրթությունների մշակութային և կրոնական ժառանգության պաշտպանության հարցերի վերաբերյալ ու առաջ մղելու միջազգային համագործակցությունն այդ ուղղություններով:
