«Իմ քայլը» հիմնադրամը, «Ճախրուկ» ՀԿ-ն, Երևանի քաղաքապետարանը, «Երեմյան Փրոջեքթս»-ը և «Դայմոնդ» ռեստորանը ստորագրեցին հուշագիր, որով կյանքի կկոչվի սոցիալական սրճարան հիմնելու «Ճախրուկ» ծրագիրը․ սրճարանում աշխատելու են մասնագիտացված խնամքի կենտրոնների սաները և նրանց ընտանիքի անդամները:
«Արմենպրես»-ի փոխանցմամբ՝ հուշագիրը ստորագրեցին «Իմ քայլը» բարեգործական հիմնադրամի գործադիր տնօրեն Աննա Հակոբյանը, «Ճախրուկ» ՀԿ-ի հիմնադիր Աննա Մխիթարյանը, Երևանի փոխքաղաքապետ Լևոն Հովհաննիսյանը, «Երեմյան Փրոջեքթս»-ի հիմնադիր տնօրեն Դավիթ Երեմյանը և «Դայմոնդ» ռեստորանի հիմնադիր-տնօրեն Նարինե Չարչյանը:
«Իմ Քայլը» հիմնադրամի ծրագրերի և արտաքին կապերի գծով փոխտնօրեն Թալին Թօփալաքեանը նշեց, որ սոցիալական սրճարան հիմնելու գաղափարը թե՛ պետության, թե՛ «Իմ քայլը» հիմնադրամի, թե՛ մյուս գործընկերների ծրագրերում մշտապես եղել է:
«Մեր բոլորի առաքելությունն է՝ խթանել հաշմանդամություն ունեցող անձանց ներգրավվածությունը մեր հասարակության մեջ: Այսօր մենք տվեցինք սոցիալական սրճարան հիմնելու «Ճախրուկ» ծրագրի մեկնարկը, որտեղ պետք է աշխատեն մտավոր և ֆիզիկական խնդիրներ ունեցող անձինք: Մենք, այս սրճարանը հիմնելով, փորձում ենք ապահովել նրանց ինտեգրումը հասարակությանը, կոտրել կարծրատիպերը։ Նաև հանրությանը կրթելու եղանակով փորձում ենք պակասեցնել հանրության կողմից խտրական վերաբերմունքը մտավոր և ֆիզիկական խնդիրներ ունեցող անձանց նկատմամբ: Հաշմանդամություն ունեցող անձինք այս ընթացքում «Երեմյան Փրոջեքթս»-ի և միջազգային այլ գործընկերների աջակցությամբ անցնելու են դասընթացներ և վերապատրաստումներ, որպեսզի պատրաստ լինեն աշխատելուն»,- ասաց նա:
Թօփալաքեանն ընդգծեց՝ եթե բոլոր աշխատանքները անխափան ընթանան, սրճարանը կբացվի 2025 թվականի ամռանը:
«Ճախրուկ» ՀԿ-ի հիմնադիր Աննա Մխիթարյանը նշեց, որ այս սրճարանի հիմնումը «Ճախրուկ»-ի սաների երազանքն էր:
«Արդեն հինգ տարի է՝ մենք աշխատում ենք երեխաների հետ, և այս տարիների ընթացքում նրանց երազանքները դառնում են մեր երազանքներն ու հակառակը: Այս ամբողջ ընթացքում մենք հասկացանք, որ այս մարդիկ պետք է աշխատեն, դուրս գան նոր միջավայր և փորձեն շփվել բոլորի հետ, այսինքն՝ այդ սահմանափակ միջավայրից դուրս գան: Այդպես էլ առաջացավ գաղափար, որ ստեղծենք մի միջավայր, որտեղ կաշխատեն հատուկ կարիքներ ունեցող անձինք՝ «Ճախրուկ»-ի սաները, ինչպես նաև հաշմանդամություն ունեցող այլ անձինք: Քանի որ գիտենք, թե հաշմանդամություն ունեցող անձանց համար այսօր ինչքան դժվար է աշխատանք գտնելը, որտեղ նրանք իրենց լիարժեք կզգան»,- ասաց Աննա Մխիթարյանը:
Ծրագրի իրականացման ճանապարհին շատ բարդ փուլեր են սպասվում, բայց Աննա Մխիթարյանը վստահ է, որ ցանկացած դժվարություն կհաղթահարեն՝ ի բարօրություն յուրաքանչյուր անձի, որը կգա, կաշխատի և կունենա հնարավորություն լինել այս տարբերվող, հետաքրքիր ու մշակութային միջավայրի մի մասը:
