Վլադիմիր Զելենսկին մտադիր է մեկնել ԱՄՆ, որպեսզի անձամբ թույլտվություն խնդրի ԱՄՆ նախագահ Ջո Բայդենից՝ հեռահար արևմտյան զենքով Ռուսաստանի խորքերը հարվածներ հասցնելու համար։ Այս մասին գրում է գերմանական Bild պարբերականը։
Նշվում է, որ Զելենսկին Վաշինգտոն կմեկնի առաջիկա մի քանի շաբաթվա ընթացքում: Այնտեղ նա իր ռազմավարությունը կներկայացնի Սպիտակ տան գործող սեփականատեր Ջո Բայդենին, ինչպես նաեւ նախագահի թեկնածուներ Քամալա Հարիսին եւ Դոնալդ Թրամփին, փոխանցում է «ՌԻԱ Նովոստի» — ն:
Ավելի վաղ հաղորդվել էր, որ Զելենսկին ԱՄՆ այցի ժամանակ ցանկանում է ներկայացնել իր «պլանը», որը ներառում է ռազմաճակատի առանձին հատվածներում կրակի դադարեցման համաձայնություն:
Մինչդեռ նախօրեին հայտնի է դարձել, որ Ուկրաինան ԱՄՆ-ին և Մեծ Բրիտանիային է փոխանցել այն թիրախների ցանկը, որոնց ուղղությամբ նա մտադիր է հեռահար զենքով հարվածներ հասցնել Ռուսաստանին, եթե Ուկրաինայի զինված ուժերին թույլ տան դա անել:
