Քննարկում ենք Ազգային ժողովի նախագահի երեք տեղակալի ընտրության հարցը: Այս մասին Ազգային ժողովի 9-րդ գումարման առաջին նստաշրջանին ասել է ԱԺ նախագահ Ռուբեն Ռուբինյանը:
Նա նշել է, որ Ազգային ժողովի կանոնակարգ սահմանադրական օրենքի 137-րդ հոդվածի համաձայն, Ազգային ժողովի նախագահի տեղակալների պաշտոններում պատգամավորների կազմից թեկնածուների առաջադրման իրավունքը պատկանում է խմբակցություններին, որից հետո խոսքը փոխանցել է «Քաղաքացիական պայմանագիր» խմբակցության ղեկավար Արուսյակ Մանավազյանին:
««Քաղաքացիական պայմանագիր» խմբակցությունն Ազգային ժողովի նախագահի տեղակալի թեկնածու է առաջադրում Հայկ Կոնջորյանին:
««Քաղաքացիական պայմանագիր» խմբակցությունն Ազգային ժողովի նախագահի տեղակալի թեկնածու է առաջադրում Վահագն Ալեքսանյանին»,-հայտարարել է Մանավազյանը:
Ռուբինյանը, Ազգային ժողովի նախագահի տեղակալի երրորդ պաշտոնում ընդդիմադիր խմբակցության թեկնածու առաջադրելու համար ձայնը տվել է «Ուժեղ Հայաստան» խմբակցության քարտուղար Տիգրան Աբրահամյանին:
««Ուժեղ Հայաստան» խմբակցությունն Ազգային ժողովի նախագահի տեղակալի պաշտոնում առաջադրում է Արամ Պողոսի Վարդևանյանին»,-ասել է Աբրահամյանը:
«Այսպիսով, Ազգային ժողովի նախագահի տեղակալի երեք թեկնածուներն են երեք պաշտոնների համար՝ Հայկ Կոնջորյանը, Վահագն Ալեքսանյանը և Արամ Վարդևանյանը»-հայտարարել է Ռուբեն Ռուբինյանը։
