ԱՄՆ նախագահ Դոնալդ Թրամփը և Իսրայելի վարչապետ Բենիամին Նեթանյահուն ուսումնասիրում են Իրանի ցամաքային շրջափակման գաղափարը, հաղորդում է The Telegraph-ը՝ հղում անելով իր սեփական աղբյուրներին։
Թերթը նշում է, որ ԱՄՆ-ի և Իսրայելի առաջնորդները քննարկել են այս տարբերակը երեքշաբթի օրը Օվալաձև աշխատասենյակում կայացած հանդիպման ժամանակ։
Հոդվածում նշվում է, որ այս գաղափարն իրականացնելու համար ԱՄՆ-ն և Իսրայելը, հավանաբար, ստիպված կլինեն ճնշում գործադրել Իրանի հարևանների վրա՝ փակելու իրենց սահմանները և դադարեցնելու իրանական արտահանումն ու ներմուծումը։
Իրանը սահմանակից է Ադրբեջանին, Հայաստանին, Աֆղանստանին, Իրաքին, Պակիստանին, Թուրքմենստանին և Թուրքիային։
Թերթը նշում է, որ եթե երկրներից որևէ մեկը համաձայնի համագործակցել ցամաքային շրջափակման հարցում, ապա այն կարող է բացասական տնտեսական հետևանքների բախվել առևտրի կրճատման պատճառով։ Ավելին, կա իրանական հարվածների ենթարկվելու ռիսկ։
Թերթը չի բացառում, որ ԱՄՆ-ն և Իսրայելը կարող են այս ծրագիրն օգտագործել որպես խաբուսիկ մանևր՝ Թեհրանին իրենց իրական մտադրություններից շեղելու համար։
