ՀՀ քննչական կոմիտեի տարածքային ստորաբաժանումների ղեկավարները Շանհայ քաղաքում մասնակցել են Չինաստանի հանրային անվտանգության նախարարության կողմից կազմակերպված «Հայաստանի համար կիբեռհանցագործությունների դեմ պայքար» խորագրով վերապատրաստմանը:
Դասընթացի շրջանակում գործուղման խմբի անդամներին ներկայացվել են ֆինանսական ահաբեկչության դեմ պայքարի, փողերի լվացման հակազդեցության, կիբեռհանցագործությունների դեմ պայքարի չինական փորձի և արդյունքների, էլեկտրոնային տվյալների քննության տեխնոլոգիայի և մեթոդաբանության վերաբերյալ դասախոսություններ:
Նկատի ունենալով, որ խմբի անդամներն իրենց ենթակայությամբ գործող ստորաբաժանումներում առնչվում են կիբեռհանցագործությունների և տեղեկատվական տեխնոլոգիաների կիրառմամբ կատարված այլ իրավախախտումների վերաբերյալ հաղորդումներին ու քրեական վարույթներին, ուստի դասընթացի շրջանակում ստացված գիտելիքներն ու փորձը կնպաստեն ինչպես մասնագիտական կարողությունների զարգացմանը, այնպես էլ համապատասխան ստորաբաժանումների գործունեության արդյունավետության բարձրացմանը։
