Հարավային Կովկասում երկարատև խաղաղության և կայունության ապահովումը Անկարայի արտաքին քաղաքականության գերակա խնդիրներից մեկն է։
Ըստ APA-ի՝ սա արտացոլված է Թուրքիայի արտաքին գործերի նախարարության 2026 թվականի գործողությունների ծրագրում։
Փաստաթղթում ասվում է, որ Հայաստանի հետ հարաբերությունների կարգավորման գործընթացը կշարունակվի Ադրբեջանի հետ սերտ խորհրդակցություններով և համակարգմամբ։ Թուրքիան նաև կշարունակի աջակցել Հայաստանի և Ադրբեջանի միջև խաղաղության գործընթացին։
Թուրքիայի արտաքին գործերի նախարարությունը նշել է, որ Ադրբեջանին ցուցաբերվող աջակցությունը կշարունակվի ամրապնդվել Հարավային Կովկասում հակամարտությունների կարգավորումը հեշտացնելու և տարածաշրջանում խաղաղություն և կայունություն ապահովելու համար։
Փաստաթղթում ընդգծվում է, որ հայ-թուրքական և հայ-ադրբեջանական գործընթացները պետք է առաջ ընթանան համակարգված ձևով՝ տարածաշրջանում երկարաժամկետ կայունություն, բարգավաճում և անվտանգություն ապահովելու համար։
Զեկույցում հատուկ ուշադրություն է դարձվում Ադրբեջանի հետ հարաբերություններին։ Այնտեղ նշվում է, որ այս բացառիկ հարաբերությունները, որոնք հիմնված են լեզվի, պատմության, մշակույթի և ինքնության ընդհանրության վրա, կշարունակվեն ամրապնդվել բարձր մակարդակի շփումների միջոցով։
«Նպատակն է, որ մեր ռազմավարական գործընկերությունը նպաստի Հարավային Կովկասում խաղաղությանը, բարգավաճմանը և կայունությանը երկկողմ և բազմակողմ նախաձեռնությունների միջոցով»։ Միևնույն ժամանակ Ադրբեջանի հետ մեր սերտ համակարգումը և համագործակցությունը վճռականորեն կշարունակվեն տարածաշրջանում հարաբերությունների կարգավորման գործընթացների շրջանակներում»,- ասվում է փաստաթղթում։
Թուրքիայի արտաքին գործերի նախարարության գործողությունների ծրագրում ընդգծվում է, որ Անկարան կշարունակի համակարգել իր գործողությունները Ադրբեջանի հետ՝ 2026 թվականին Հարավային Կովկասում խաղաղության օրակարգը առաջ մղելու համար։
