«Այսօր որոշել եմ խոսել հորս մասին։ Մի բան, որ երբեք չեմ արել»։ Այս մասին Ֆեյսբուքյան իր էջում իր մանկության հիշողությունների մասին տեսաուղերձ է հրապարակել Գագիկ Ծառուկյանի դուստրը։
Նա նշում է, որ դա չի արել, երևի որովհետև ամենամեծ զգացմունքները միշտ ամենադժվարն են բառերի վերածվում։
«Իմ մանկության ամենավառ հիշողությունը սկսվում է այն պահից, երբ նա ձեռքս բռնած գնում է եկեղեցի։ Այդ ճանապարհին մարդիկ մոտենում էին հորս, պատմում իրենց ցավերի, դժվարությունների ու հույսերի մասին։ Ես պարզապես տեսնում էի, որ մարդիկ վստահում էին նրան, որովհետև զգում էին՝ հնարավորի սահմաններում ձեռք կմեկնի»,-ասել է նա։
Ծառուկյանի դուստրը խոստովանում է, որ նա հետո հասկացավ, որ եթե մարդիկ դիմում են հայրիկին, ուրեմն նա Աստծո առաքելություններից մեկը՝ մարդկանց կողքին լինելն ու նրանց օգնելն է դարձրել։
«Մանկուց հիշում եմ, թե ինչպես էր ամեն երեխայի աչքերում նա տեսնում ամբողջ ապագան և անում ամեն բան, որ այդ երեխան հնարավորություն ունենա երազելու։ Փոքրիկ մարզիկների մեջ նա տեսնում է ապագա հաղթողների և նրանց նվիրում ոչ միայն հնարավորություն, այլև վստահություն, որ իրենք կարող են հասնել մեծագույն նվաճումների։
Հայրս կյանքում ոչ մի խոստում չի մոռացել, և ոչ մի խոստում անկատար չի թողել և չի թողնելու։ Նրա խոսքը միշտ գործ է, իսկ գործը՝ պատասխանատվություն։ Հայրս մեզ միշտ սովորեցրել է սիրել մարդկանց, չնախանձել, չատել, չչարանալ, չփոքրանալ և միշտ մարդ մնալ՝ անկախ ամեն ինչից։ Սովորեցրել է, որ ուժեղ լինելը բարձր խոսելը չէ, այլ այն, որ կարողանաս ներել, օգնել, ձեռք մեկնել և երբեք չկորցնել մարդ լինելու հատկությունը։
Բայց եթե ինձ հարցնեն, թե որն է հորս ամենամեծ ուժը, ես առանց վարանելու կասեմ՝ նրա սիրտը։ Եվ եթե կյանքում երբևէ ամենամեծ հպարտությունս մեկ նախադասությամբ պիտի արտահայտեմ, ապա պարզապես կասեմ՝ ես Գագիկ Ծառուկյանի աղջիկն եմ»,-եզրափակել է Գագիկ Ծառուկյանի դուստրը։
Մանրամասները՝ տեսանյութում։
