Պակիստանի վարչապետ Շեհբազ Շարիֆը հայտարարել է, որ Իսլամաբադը, իր բարեկամների և գործընկերների աջակցությամբ, հավատարիմ կմնա տարածաշրջանում խաղաղության և անվտանգության ամրապնդմանն ուղղված ջանքերին։ Ըստ Պակիստանի վարչապետի գրասենյակի, Շարիֆն այս մասին ասել է կիրակի օրը Իրանի նախագահ Մասուդ Փեզեշքիանի հետ 45-րոպեանոց հեռախոսազրույցի ընթացքում՝ ողջունելով իրանցի պաշտոնյաների կառուցողական դիրքորոշումը Թեհրանում Պակիստանի բանակի գլխավոր հրամանատար գեներալ Ասիմ Մունիրի հետ բանակցություններում։
Համաձայն հայտարարության, Շարիֆը և Փեզեշքիանը մանրամասն քննարկել են տարածաշրջանում տիրող իրավիճակը։
Նշվում է նաև, որ Շարիֆը շնորհակալություն է հայտնել Իսլամական հեղափոխության առաջնորդ այաթոլա Սեյեդ Մոջթաբա Խամենեիին և Իրանի նախագահին՝ ապրիլի 11-12-ին ամերիկացի բանակցողների հետ քննարկումների նպատակով խորհրդարանի խոսնակ Մոհամադ Բաքեր Ղալիբաֆի և արտաքին գործերի նախարար Աբաս Արաղչիի գլխավորությամբ բարձրաստիճան պատվիրակություն Իսլամաբադ ուղարկելու համար։
Պակիստանի վարչապետն Իրանի նախագահին տեղեկացրել է Սաուդյան Արաբիայի, Կատարի և Թուրքիայի իշխանությունների հետ իր վերջին հանդիպումների մասին։ Նա նշել է, որ նման շփումները շատ օգտակար են եղել երկխոսության և դիվանագիտության կայուն գործընթացին աջակցելու հարցում համաձայնության գալու համար՝ նպատակ ունենալով տևական խաղաղություն հաստատել պատերազմից տուժած տարածաշրջանում։
Հայտարարության մեջ ասվում է, որ Փեզեշքիանը երախտագիտություն է հայտնել Պակիստանի վարչապետին և բանակին՝ խաղաղության ջանքերին Իսլամաբադի հաստատակամ հավատարմության համար, և կոչ է արել զարգացնել երկու երկրների միջև հարաբերությունները, հայտնում է Press TV-ն։
